近年好少好少喺香港電影見到嘅楊恭如，終於都返香港拍戲喇。
楊恭如、譚耀文同梁琤日前《辣警霸王花2》喺鑽石山火葬場拍攝，無錯，係《縱橫四海》嘅路雪同明智傑。呢次佢哋唔係演兄妹，而係演一對夫妻。
呢場戲係講梁琤去到鑽石山火葬場，回憶番譚耀文所演嘅譚Sir，身邊仲有好愛好愛佢嘅太太楊恭如蹺住手，同梁琤擦身而過。
43歲嘅楊恭如果然係亞姐中嘅亞姐，就算只係着上一件白色長袖襯衫加一條啡色長裙，依然係滲出一陣少女味，完全唔覺身材有走樣。
楊恭如話好耐都冇返香港拍電影，第一次同譚耀文合作係99年《縱橫四海》，數數手指都接近20年。譚耀文話過去咁多年嚟，同恭如有過三次合作，第一次係《縱橫四海》，之後係大陸劇《黑煞之 我心不死》，呢次合作係第三次，仲話終於有機會做夫妻。
合演夫妻有冇親熱戲份？楊恭如話暫時未有，最多都應該係擁抱，不過譚耀文就話：「應該不斷加緊，表達我哋甜蜜回憶，佢呢啲係導演決定。」
講到好耐都冇返嚟香港拍戲，楊恭如話好多時間都喺大陸拍劇拍電影，佢仲話講得國語多，要講番廣東話唔係好慣，講起上嚟仲有啲窒下窒下。楊恭如o依家長住喺北京同上海，因為香港都有屋企，都會返嚟食嘢買嘢，有時都會返嚟探下媽咪。
至於譚耀文就話連埋《辣警霸王花2》，嚟緊會同時拍三套電影，呢次要飾演一個患精神分裂嘅阿Sir，同患病嘅老婆楊恭如互相扶持，佢仲話角色名「譚家明」係自己改：「呢個名係電影《父子》嘅導演名，好鍾意呢套電影，希望對方唔好介意。」
而梁琤就話呢場係ending戲，回憶番20年前嘅譚sir，梁琤話呢次唔多動作戲：「有啲開槍戲同開車戲，角色好壓抑，所以演戲部份比較辛苦。」
| 攝影：葉君海 | | |
| | | |
| | | |
| | |
|
鍾意就快D Share啦！
|
|
|