鄧達智喜宴未邀家人見證：唔想佢哋忐忑
香港著名時裝設計師鄧達智今日與公立醫院醫生男友陳梓欣結婚，即使香港同性婚姻未合法化，兩人仍破格在港擺喜酒！排除萬難結婚的兩人獲大部分家人支持，但鄧達智不忍心家人在場有忐忑感受，重視親情的他最終決定不邀請家人出席婚宴。
59歲的鄧達智（William）與44歲的陳梓欣（Clement）去年撻着，拍拖一年，今年7月訂婚。正如鄧達智所言兩人雙親已過身，如今已無後顧之憂，故決定閃婚。但身為元朗屏山坑頭村鄧氏第二十六代長子的他出櫃兼結婚，已令村中父老有微言，他為免將來伴侶與其家人有任何財產紛爭，甘願放棄家族傳下來的豐厚家產，將之轉贈給七位姪兒。他說：「我有兩個細佬，佢哋每人有兩個仔，計埋細媽嗰邊三個姪，加埋七個姪兒，最大嘅祖屋會轉名畀大細佬個大仔，佢係長子，其餘幾間村屋就分畀其他姪兒，傳統都係傳畀男，我啲姪女本身都好叻女。之前話我放棄千萬家產，依家新界一間村屋已經過千萬，放棄千萬太少喇！（即係放棄過億家產？）冇計幾多。」
William不單止將家族祖屋村屋全送姪兒，早前他更將自己一個市區私人物業轉贈給姪兒，自己只保留少許物業，他說：「我剩番好少畀自己，打算將來過簡單嘅生活，幾年前已經買咗份好重嘅退休保險，我見好多人衰收尾，老時投資冇晒啲錢，我係防止將來自己煩到人。而Clement喺墨爾本同人夾份買咗間屋，我打算買咗佢朋友嗰份，成為我哋第一個聯名物業。」
冧爆試戴婚戒
將家產安排得妥妥當當後，昨日他現身金鐘出席一個頒獎禮任嘉賓，其後頻頻撲撲到中環Tiffany & Co.珠寶店取婚戒。他入到店內取得婚戒後，滿面笑容地慢慢試戴，左轉右轉啱Size冇問題後，帶住幸福笑容包走離開。
原來早於上周，William已同未婚夫到影樓拍婚照，由香港著名攝影師Ringo Tang操刀。兩人頭貼頭勾手指尾，大晒恩愛，他說：「其實我哋冇諗過影婚照，唔搞咁多嘢，係Ringo話送畀我哋嘅結婚禮物，嗰日我哋換咗兩套衫，西裝和短褲，影咗兩個鐘。（做model慣？）我OK，Clement就緊張啲，我帶住佢，佢好唔慣對鏡頭。」
弟弟封嘴 後輩支持
他續透露今晚婚宴不會有任何傳統習俗，更不會請家人出席見證：「我冇叫屋企人嚟，佢哋係好撐我，但面對呢個反傳統場面，佢哋會用乜嘢心情面對？我自己都咁忐忑，唔想佢哋都忐忑，所以一個家人都冇叫。」William曾透露自出櫃後，其中一個弟弟沒有跟他說話，反而收到細媽的女兒傳短訊叫他為自己而活，而且大部分後輩都支持其決定。他透露明年6月15號將飛英國正式註冊，屆時家人會出席支持。
記者走訪鄧達智的元朗祖屋，見門外張貼寫着「鸞鳳和鳴 光前裕後」的紅紙，堪輿學家陳子才表示：「鸞鳳和鳴，鸞鳳的鳴聲相應和，寓意夫妻和睦相待。光前裕後，光大祖業，為祖宗爭光，為後代造福。（男男婚姻都得？）佢哋都會正式註冊，成為合法伴侶，所以冇問題。」
文：名人組
|
鍾意就快D Share啦！
|
|
|