擁有G Cup上圍嘅𡃁模麥紫莉（Chili），承認早前話去日本拍AV只係放流料，係佢同前經理人公司炮製出嚟嘅宣傳橋段，真係呃鬼食豆腐喎！Chili今日出席ViuTV嘅「G-1格鬥會 II」活動，被問番呢件事，講到佢畀人話係大話精？佢話：「做得呢樣嘢就預咗。（你唔介意？）冇得介意，其實自己預咗之後會有更多負面評價，有更加多難聽嘅說話，冇得驚。（呢件事阻你搵錢路向？）依家努力補救番，挽救唔好嘅形象。」
回復自由身
至於係咪同經理人已經完咗合約？Chili話：「係，我係自由身，今次係自己同ViuTV簽約。（簽新公司？）睇吓有冇公司搵我，唔排除簽。（睇錢為重？）錢係重要，係我需要，但要睇公司畀到咩我。（如果新公司想你繼續性感示人？）冇諗過，想畀大家睇到我另一面，唔止性感，我有其他賣點，好似今次咁親身上台比賽，唔係個個女仔敢。」佢又話參加呢次G-1格鬥會係想挑戰自己：「未接觸過呢項運動，唔想畀人覺得我靠性感路線，自己講實力嘅。（驚畀人集中打胸部？）唔驚，我已經學拳個幾月。」佢仲話唔驚受傷，亦唔驚畀人打到毀容。
被麥家琪婉拒合照
講到今次格鬥會會去到日本拍攝，佢之前又講過去日本拍AV，驚唔驚畀人噓？佢就話唔驚：「香港已經咁多人講啦，去到日本仲咁樣畀人話嘅話，我已習慣，所以唔怕。」同場嘅藝人麥家琪被邀同Chili合照時，就以補妝為由行開，似係婉拒合照，問Chili認唔認識對方？佢話有睇過麥家琪嘅戲，講到今次比賽佢最後生，麥家琪最年長，Chili就話會公平比賽，體力唔關年紀事。
-------------------------------
東網已全面支援360影片及相片，讓你全方位睇盡新聞大事，恍如置身現場，立即登入東網360網頁： http://on.cc/360/
如仍未更新東網App，請按此連結收睇360影片：https://goo.gl/1nsUJe
|
鍾意就快D Share啦！
|
|
|
