陳嘉寶賴慰玲夾都冇咁啱撞日入紙結婚
藝人賴慰玲（Winki）和陳嘉寶（Anjaylia）情同姊妹，想不到連結婚都默契十足！兩人被揭同於上月28日入紙申請結婚，懷孕7個月的Winki將與舞台劇演員梁子峰奉子成婚，Anjaylia則嫁給初戀情人黃頌祈。兩女笑言冇夾過，證明她們超有緣分，Anjaylia直言要為此約食飯慶祝一番！
現年31歲的藝人賴慰玲今年7月趁生日在社交網宣布懷孕5個月，另一半是拍拖5年的舞台劇演員梁子峰。為趕及在小生命出世前結婚，兩人已秘密於上月28日入紙申請註冊！至於曾與Winki合作劇集《殭》、現年27歲的陳嘉寶將於11月25日舉行婚禮，嫁給任職滑水教練的初戀情人黃頌祈。無獨有偶，Anjaylia亦在上月28日入紙，兩女戲內戲外都是好友，連入紙結婚都揀埋同一日，果然心有靈犀！
Winki簡單食餐飯
兩位準新娘接受本報訪問，均笑言不知道對方入紙日期，Anjaylia說：「我都係啱啱先知咋！證明我哋好有緣分！會為呢件事食飯慶祝吓！咁佢都好Ready結婚我又籌備中，大家都係咁上下時間，但真係估唔到會撞埋同一日！」其實Winki曾於上月16日上載跟Anjaylia飯敍的照片，兩女必定有分享生活軼事，卻似乎沒有提到入紙日期，而上月28日Anjaylia在網上表示正拍攝廣告，可能入紙一事交由別人負責。
Winki受訪時就表示早已打算今年內結婚，懷孕後更想雙喜臨門，但婚禮會低調進行：「有埋BB就一於雙喜臨門，註埋冊咁，依家BB七個月，所以婚禮唔會太過鋪張，會係簡單同屋企人食餐飯。（佗BB辛苦？）唔會，反而好舒服，主要都係散吓步，變咗多啲時間搞結婚嘅嘢。」
Anjaylia未諗生仔
至於Anjaylia笑言婚禮都交由婚禮統籌人員安排：「佢哋話差唔多時間入紙，我哋就跟住個時間表做，聽晒佢哋話。（婚禮籌備成點？）其實我同男友都冇咩所謂，都係睇住啲選擇題去揀，婚禮統籌人員都笑我哋咩都唔知。（心情點？）仲有兩個幾月，未感受到緊張。（拍完劇集《誇世代》，係咪開始放假準備婚禮？）都唔係呀！仲有出Trip拍廣告，會繼續工作，可能結完婚第一日就做嘢。」講到Winki將做媽咪，問到Anjaylia的生育計劃，她說：「始終有一日會生嘅，但依家搞好結婚先，未諗呀！順其自然」
文：影視組
|
鍾意就快D Share啦！
|
|
|