無綫上位姐仔李佳芯（Ali）早排被影到同ViuTV 男友陳炳銓拍拖跑步「Run」仔，我Nuts哥睇完篇報道，即刻諗起Ali曾經喺商場活動翻唱過台灣歌手田馥甄嗰首《小幸運》！咪以為Nuts哥想取笑Ali魔音級嘅歌藝，相反，Nuts哥係真心戥佢兩個高興，事關喺家陣呢個物欲世界，竟然有人拍拖唔係行山，就係跑步，全港近九成以上拍拖最叻只係行過鑽石山、炮台山嘅拖友都應該為此感到汗顏，更加唔應該試圖去「葡萄」陳炳銓憑乜得到女神Ali芳心，如果仲去詆毀人哋係「美女與野獸」，就真係踩人踩到過晒界！
坦白講，作為有線友逃亡去無綫求出生天，Ali條姐仔路係唔似得黃翠如開得咁平坦直接，但即使被派演二奶、小三等夠淫夠賤又夠衰嘅角色，Ali都冇嫌三嫌四，反而照單全收，人棄我取，全情投入豁出去，寧願一心一意做好邪花角色，結果又畀佢殺出新血路，憑住喺《名門暗戰》演岳華嘅二姨太，黃浩然、李天翔嘅情婦，大晒床技，成功彈起，搶鏡程度比其他扮乖乖女等運到嘅花旦，只有過之而無不及！之後喺《巨輪II》被吳岱融掟錢鬧「臭雞」，更加唔使講，早已成為網絡洗版經典！
「姣婆」男女都Buy
無可否認，Ali喺《潮流教主》、《踩過界》演帶點邪氣嘅謎之女，效果好過佢喺《律政強人》演入世未深純情少女多多聲，但就係因為咁樣先更加見到佢有演技！事關鏡頭後嘅Ali係鍾情行山、跑步、水墨畫嘅健康女性，只係因為劇情需要，至喺鏡頭前主動咀「盲俠」王浩信，再講出諸如「你每次約我都有目的嘅，不過我Buy喎！」嘅對白，呢類劇情，男觀眾當然睇到好似戴咗VR虛擬實境眼鏡咁，完全投入置身其中，當正Ali喺度Flirt緊自己，但與此同時，一個唔留神，就會被女觀眾喪鬧「死姣婆，唔知博乜！」不過Ali並冇呢種煩惱，女觀眾對佢唔只唔反感，似乎仲幾受落，否則都唔會有做香港市場嘅韓國化妝品牌搵Ali拍廣告，搵個得罪米飯班主嘅人嚟拍廣告，你估嫌錢腥咩！
《美女與野獸》夠浪漫
Ali生得眉清目秀，好眉好貌，現實係天使，拍劇就做魔鬼，冰火同時集一身嘅佢，之前回應同男友被嘲係「美女與野獸」，就夠晒外冷內熱，佢話：「我幾鍾意睇《美女與野獸》，幾浪漫！其實佢都拍劇做男主角喎，喺我角度唔覺得女尊男卑！」大方得體，應對攞滿分之餘，仲有一種佢喺《踩》劇講到搵男友「要同我Sync（同步）到」嘅自信同滿足！
雖然Ali嘅歌藝的確有進步空間，但各界都唔好咁吹毛求疵喇，正如另一位Ali —拳王阿里話齋：「一個人，無論怎樣傑出和卓越，他都不是無所不能的超人。」
|
鍾意就快D Share啦！
|
|
|