兩周內痛失四良才
綠葉廖麗麗舌癌離世
香港演藝圈在短短兩周內痛失四位資深演員和幕後人，第一代兒童節目主持王曦（加明叔叔）上月底因病逝世，享年94歲。事隔一星期，在無綫擅演三姑六婆的資深綠葉廖麗麗、60年代邵氏當紅女星秦萍，以及曾8奪香港電影金像獎最佳音效的資深音效大師曾景祥，竟先後於過去一周內離世，令人深感痛惜。
原來廖麗麗今年7月患上舌癌，進行割脷手術後，癌細胞急速擴散到淋巴及肺部，延至上周一不治離世，享年70歲，廖麗麗獨生女Sindy昨哭着說：「佢係一個好堅強嘅人，媽咪好勇敢，割咗大半條脷之後重新適應講嘢，但傷口係咁流血水，跟住擴散到淋巴同個肺。」
於無綫劇擅演三姑六婆的廖麗麗，於上周一因舌癌病逝，享年70歲。電視圖片
加盟無綫30年來擅演三姑六婆和闊太的資深演員廖麗麗，11年曾患上乳癌，經治療後本已康復，豈料今年7月竟不幸患上舌癌，儘管廖麗麗即時切去半條舌頭，但最終因癌細胞迅速擴散到淋巴和肺部，延至上周一凌晨於東區醫院不治逝世，享年70歲。廖麗麗拍過逾百部劇集，最後演出作品是月前剛煞科的《誇世代》，不過歷年最令觀眾印象作品，是《大時代》演法官當庭訓斥丁蟹鄭少秋。
廖麗麗於《大時代》演法官訓斥丁蟹一幕最令觀眾深刻。電視圖片
廖麗麗於89年曾與張衞健等合作拍劇集《嬴單傳奇》。
割半條脷難吞嚥
記者昨日聯絡廖麗麗的獨生女Sindy，她在傾談母親抗癌經歷時，數度忍不住痛哭，她說：「佢之前係乳癌，但已經康復，今次係脷癌，轉移到去淋巴。其實佢自己都唔知個嚴重性，走得好突然，佢係一個好堅強嘅人，佢早幾個月發現條脷有粒細痱滋，一路都冇好，我哋都冇為意係嗰件事，冇諗到咁嚴重。後來知道係脷癌，要即刻切除癌細胞，條脷割咗一大半，講唔到嘢，食嘢都有困難，媽咪仲同我講：『第時講唔到對白㖭。』我同佢講健康最緊要，你乜都唔好諗。」說話至此，Sindy又再忍不住痛哭。
Sindy指母親患癌以來一直勇敢和堅強面對，她說：「佢今年7月17號做手術，做完手術之後身體好弱。媽咪好勇敢，割咗大半條脷之後重新適應講嘢，但傷口係咁流血水，跟住擴散到淋巴同個肺。」Sindy透露母親癌細胞急速擴散，但真正死因，仍有待驗屍報告。
薛家燕與歐瑞偉對廖麗麗的離世深感愕然。資料圖片
歐瑞偉 資料圖片
家燕姐：好愕然
廖麗麗由發現患舌癌到癌細胞擴散離世僅兩個月，不少圈中好友均感到極度突然和難過，薛家燕曾與廖麗麗拍過《皆大歡喜》等劇，對於廖麗麗突然離世，家燕姐昨表示：「我早幾月拍《燦爛的外母》時喺化妝間撞過佢拍第二套劇，我仲問佢有冇跳拉丁舞㖭，佢話『有！』見佢好精神冇乜嘢喎。佢係拉丁舞高手，所以keep到個身形咁弗，聽到呢個消息真係好愕然，大家真係要珍惜身邊人。」曾與廖麗麗合作多年的歐瑞偉昨說：「噚日接到消息，大家都好愕然，但唔知佢乜嘢病。」
另外，無綫昨對資深藝員廖麗麗離世表示深感惋惜，透露藝員科經已與其女兒緊密聯繫，並盡力協助其家人辦理後事。
採訪：魯吉
【醫生話】「初初會似生痱滋」
對於舌癌一病，耳鼻喉科黃漢威醫生昨接受本報訪問，指有吸煙、飲酒習慣或舌頭經常出現創傷的人士，患病的機率較一般人高。至於如何能察覺病徵？黃醫生指：「初初會好似生痱滋咁，好多時會喺舌頭左右兩旁嘅位置，如果發現痱滋一直都唔埋口唔好番，就要特別留意喇！」
黃醫生續指：「舌癌同其他癌病一樣分為四期，如果係一、二初期嘅話，可以透過電療方法去醫治，又或者將舌頭上癌細胞部份切除再縫合就可以，但如果擴散咗去其他地方，咁就要配合其他手術或藥物進行治療。」
|
鍾意就快D Share啦！
|
|
|