王祖藍喺演藝學院畢業後，就加入大台做收費台兒童節目主持，輾轉幾年拍劇、做《獎門人》等，可以話大台一手捧紅，不過佢日前接受訪問時就話大台「捧死新人」！
王祖藍接受訪問時稱：「陳凱琳拍《四個律師一個bar》(正名：《四個女仔三個BAR》)其實佢做得幾好；岑麗香又係《巴不得媽媽》嗰陣時幾好，但後尾點解要佢哋做古裝？嗰班鬼妹連廣東話都未講得正，佢點講古裝對白？！」
「點樣去栽培一個新人係一個好大嘅問題囉！主持都一樣，邊個係蝦人嘅、邊個係下把，呢啲matching係要度o架！如果個個主持都一樣，咪冇一個主持出囉。以前TVB可能有《歡樂今宵》，但係o依家train唔到人，得罪少少講句，香港係有啲缺乏呢種創作，同埋製作嗰種嚴緊嘅氣氛。」
【中生中旦輪住復出】
不過王祖藍要多謝「獎門人」曾志偉當年度身訂做個角色畀佢：「我做《老表》嘅時候，就承繼咗獎門人嗰樣嘢，就係度身訂造呀。你要捧新人，一定要有一個前輩帶一個新人，你一下只推晒十個都係新人嘅話，咁……要死嘅就死咗囉！但某程度上係唏噓嘅，雖然大家話邊個好戲之人出番嚟，但嗰個好戲之人40幾歲、50幾歲。」
對於王祖藍嚟講大台係一間學校，0依家畢業就同邵氏合作開工作室，旗下有近二十位藝人：「我覺得o依家係一個好嘅做法，同無綫有良好嘅關係，但係我獨立咗出嚟。因為喺呢個體制裡面，有好多規矩要守，嗰種規矩某程度上限制咗一種自由。我覺得將來都應該係咁行，如果唔係，你只會好似當年冇咗周潤發、劉德華、周星馳、梁朝偉…講唔埋欄就走o架喇！我覺得我係第一個，第二個係黃宗澤。」
做老闆都唔易，王祖藍話以前就鬧老闆，o依家就被人鬧，仲有時唔開心：「香港廿個、大陸幾十個，我都未必管得掂，所以我會明白有陣時啲嘢要一刀切。講真，我承認我忙咗就變咗黑面，但有時傷心嘅係員工一嗌唔掂數就話『有錢大晒呀？！』或者『你係老闆話咩都得啦』！」
採訪：嵐山、懷鈺
編審：懷鈺
攝錄：Andrew、Jackal
攝影：沈健程
剪接：Jackal
王祖藍鳴謝：
髮型：Ted Yeung
化妝：K.T. Tsui
服裝：SON OF A KING
造型：Dicky Lee
| 攝影：沈健程 | | |
| | | |
| | | |
|
鍾意就快D Share啦！
|
|
|
