生前對感情事一向低調的馬清儀，早前同四眼男去淺水灣放狗時，態度親暱。
探熱針
生前最後訪問 秘密男伴曝光 馬清儀：過吓優閒生活
85年健美小姐冠軍馬清儀，本月七日因癌症在嘉諾撒醫院病逝，並已於十八日出殯，終年 64歲，月前本刊仍拍得馬清儀精神奕奕在淺水灣放狗，僅僅三個月卻已離開人世。
當時馬清儀更接受本刊訪問談及近況，當時精神仍不俗的她表示現時生活是：「做吓運動，帶吓狗呀，過吓啲優閒生活。」而感情生活一向低調的她，早前孖住一名四眼男去公園放狗，兩人又拖又攬，態度親暱。
放狗過日辰
奪得健美小姐後，馬清儀加入無綫拍劇，專做有錢闊太和巴渣角色，自九十年代中就再沒有幕前演出，近年深居簡出的她，已甚少公開露面。本刊近月頻頻見到馬清儀在淺水灣附近放狗，今年七月馬清儀湊住三隻狗仔，同友人行商場，見她著住一身運動服，無論身材、樣貌都 keep得好 fit，仲一路行一路雞啄唔斷，好好中氣。
而三個月前，馬清儀更一次過帶晒八隻狗仔出街，其間見到本刊記者，亦大方接受訪問：「我都冇咩同你哋講都係差唔多做吓運動，帶吓狗呀，過吓啲優閒生活，同啲狗做吓 excercise，行吓山囉。」之後仲風騷問記者：「你影啲相靚唔靚㗎？」被問到會否復出拍劇，馬清儀就話：「好辛苦㗎！而家唔拍喇，休息吓喇！冇乜精神。」
又拖又攬
一向低調處理感情事的馬清儀，入行以來甚少緋聞，只被爆過同無綫高層趙崇文拍拖，當時有傳趙崇文曾中風，要搵氣功師傅治療，但當時馬清儀對他仍不離不棄，後來感情無疾而終。
其實早前本刊亦拍得馬清儀孖住一名高高大大的四眼男去放狗，兩人帶住八隻狗仔去公園，身後仲有三名工人幫手湊狗，沿路馬清儀更邊行邊繑實四眼男，態度親暱。行到去公園，男方又主動拖實馬清儀，同狗仔玩足大半粒鐘，兩人折返商場，沿路男方一直搭住馬清儀膊頭。去到一間狗仔用品店，馬清儀抱住狗仔不停擺 pose，四眼男就做攝影師幫她影相。逗留半個鐘，一行人坐七人車返歸。
不過記者問到男伴身份，馬清儀就非常避忌，不停擰頭話：「唔係……唔係！」但一提到狗仔，佢就一輪嘴話：「係呀八隻！有啲狗仔陪吓我，自己會開心啲嘅！佢哋陪我吖嘛。」
奪冠惹風波
85年無綫趁勢舉辦《健美小姐》選舉，富家女馬清儀奪冠引起軒然大波，事關人人睇好 18歲中韓美女林河廷，及 17歲嘅甜心港女劉美娟，最終二人卻大熱倒灶，由馬清偉胞姊馬清儀爆冷贏得冠軍，奪得亞軍的韓日混血兒大熱門林河廷，賽後炮轟無綫「造馬」，並上演一幕林河廷大熱倒灶拒絕吻賀的畫面，其後更拒絕領獎放棄名銜，要由劉美娟及何美婷補上亞、季軍。
有米健美小姐
六十四歲的馬清儀， 85年參選無綫第一屆健美小姐，當年憑 32歲高齡揮低一班後生女奪冠軍，馬清儀出身名門望族，家底豐厚，為大生銀行創辦人已故銀行家、地產商馬錦燦女兒，馬清偉胞姊。
入行後，馬清儀曾做過節目主持，拍過電影電視劇，更與周星馳及劉青雲合作過劇集《孖仔孖心肝》，不時飾演有錢闊太，甘於做小角色過日辰，代表作包括無綫長壽劇《真情》飾演謝天華阿媽，其後於娛樂圈銷聲匿跡，曾與無綫高層趙崇文傳出緋聞。
撰文、攝影、攝錄：娛樂組
|
鍾意就快D Share啦！
|
|
|
