娛頭
傳男友偷食有小三 江美儀升胸 依家佢驚過我
江美儀同吳君如細佬吳君祥拍拖 11年，最近因為分隔兩地，男方主力在北京工作，更有指吳君祥有小三偷食嚴淑明，加上江美儀同吳君祥近一年都再冇一齊現身過，所以外間都以為他們已經玩完。
但早兩星期，吳君祥突然返港，因為江美儀接拍了一個豐胸廣告，當中有性感演出，露出深長事業線，身為男友當然全程𥄫實監場。
雖然江美儀同吳君祥合體打破分手傳聞，但講到同男友的將來，江美儀都打定輸數：「如果佢突然遇到一個好鍾意，我咪祝福佢囉！」
貧胸變大胸
之前一直自稱「貧胸」一族的江美儀，事業心雖然強，但事業線就冇乜點俾人睇到，最性感都只不過是在《名媛望族》著黑絲同劉松仁跳舞一幕，但四十六歲的江美儀最近竟然接拍豐胸廣告，由 34A升 cup到 34C，著住運動 bra top拍廣告，露出深不可測事業線，果然有料到。
由於成輯相江美儀都要做出連串扭腰動作，突出澎湃上圍，搞到她腰酸骨痛，所以影影吓相要行埋一邊拉筋放鬆，不過她好滿意這副前所未有猛料架生，見到有鏡頭高抄（由高角度拍攝），她即大笑：「呢個 AV角度，勁呀！
「唔知點解啲客戶咁睇得起我個胸，唔係我個樣囉！而家睇見自己個胸，都有啲受寵若驚，你諗吓幾開心呀，以我咁嘅年紀，有咁嘅架生喎，嘩，唔得了啦直情，哈哈……」
監場𥄫到實
但拍攝中途，盛傳已經同江美儀分手的吳君祥突然現身影樓，好明顯是要𥄫實女友今次性感演出，而他亦好識做，一到場就萬歲，請所有工作人員食下午茶，在拍攝時又用手機幫江美儀影相，其間又要幫手照顧住江美儀兩隻狗仔。
對於江美儀身材變化，身為「用家」的吳君祥就好興奮，「直情流晒鼻血，一返到屋企就要攞住紙巾嚟抹。」江美儀聽到男友咁講，都好抵死表示：「咁門口要掛定卷紙巾，哈……」
江美儀同吳君祥近一年都甚少行埋，有一段時間都沒有被人發現一齊現身，甚至連吳君祥與家姐吳君如一家同父親夏春秋，每年一度家庭旅行，江美儀都竟然缺席，難怪被猜測已分手。
分隔兩地
難得二人合體，當然要問他們感情狀況，江美儀就表示：「我哋一直都冇進步，亦都冇退步，係唔知點解啲人成日覺得我哋有問題之嘛！成件事係而家佢（吳君祥）喺北京，我喺香港，因為分居所以大家誤會咗。」
既然是這樣，會唔會考慮叫男友返香港，又或者妳跟他北上發展？
「有諗過叫佢返香港，但係又咁喎，佢喺國內發展得幾好，佢又 enjoy，我又 enjoy呢度，老老實實而家我做好多角色，大家都有留意，好多大家都讚，貿然離開我唔捨得喎，我覺得唔係時候拋棄一切去北京喎。」江美儀說。
其實有冇結婚嘅打算？
「呢個問題問咗十幾年，攞張紙，其實同而家關係冇分別，唔需要因為你哋懷疑我哋，要做啲嘢去話俾你聽，我哋點樣，其實我哋兩個舒服，知道發生乜事咪得囉。」江美儀說。
唔係天長地久
但係有傳吳君祥有小三，加上分隔兩地無王管，問到江美儀怕唔怕，她就充滿自信。
「佢驚過我吖（望一望自己個胸），仲要影埋呢輯相，不如你問佢驚唔驚我有小鮮肉好過」江美儀說。
「互相嘅，大家都有市場。」吳君祥說。
之後江美儀再認真表示：「其實呢個世界上冇嘢係天長地久嘅，我會盡量去維繫囉，唔得咪 let it go，唔好咁執着囉。或者有一日我遇到一個好鍾意，咁我會同佢講，我想試吓喎，又或者佢遇到一個好鍾意喎，咁我咪祝福你。唔好諗住一定係一生一世囉，好多嘢今日唔知聽日事吖嘛，最緊要而家開心。」
現年四十六歲的江美儀， 90年代被星探發掘入行，出道初期已經與周潤發拍廣告，又曾演出劉德華 MV。
92年，江美儀簽約無綫，其後轉投亞視，於亞視做一姐多年。
09年重返無綫，受無綫力捧，一劇接一劇，包括《名媛望族》、《衝上雲霄》及《親親我好媽》等，成功入屋，人氣急升。
屢傳分訊
04年，江美儀與吳君如胞弟吳君祥撻着，自小與吳君祥的細佬讀同一間小學，吳君祥則大她四年，其後在一公開場合重遇而擦出愛火，至今二人拍拖兼同居十三年，不時孖住出席活動，江美儀更融入家中，經常現身吳家活動，早已被男方家長視為新抱仔，卻一直未有結婚打算。
多年來，吳君祥一直被指一事無成，住靠家姐，食靠女友。 12年，更被拍到趁江美儀飛巴黎拍劇沙沙滾，背女友偷食中女嚴淑明，於夜店嘴女，但江美儀採取隻眼開隻眼閉態度，表示：「當佢應酬。」早前，吳君如生日，江美儀冇影，更指男友於北京開製作公司，一年只見四、五次，聚少離多，二人再傳分訊。
撰文、攝影、攝錄：娛樂組
|
鍾意就快D Share啦！
|
|
|
