掃呢頁CODE去手機

2017年9月28日 星期四

侯強戴頭盔撐兄弟 [壹週刊 - 1438] __,M1,

侯志強講講吓,話自己講粗口就叻,仲話唔介意教人講粗口。八卦陣侯強戴頭盔撐兄弟不怕神一般的對手,最怕豬一樣嘅隊友。人稱「高佬和」嘅曾樹和同何君堯,之前喺 ...






侯志強講講吓,話自己講粗口就叻,仲話唔介意教人講粗口。

八卦陣

侯強戴頭盔撐兄弟

不怕神一般的對手,最怕豬一樣嘅隊友。人稱「高佬和」嘅曾樹和同何君堯,之前喺革走戴耀廷吶喊大會高叫「殺無赦」,被全城圍插,連建制派都紛紛與他割席,何慘變過街老鼠。同為新界佬嘅侯志強,就冇咁衰仔玩自保,戴起個頭盔力撐佢兩個。





集會當日侯志強(右)都有上台,佢都算義氣仔,力撐高佬和(中)同何君堯(左)。

侯強話大家都有言論自由,每句話都要視乎大家感受,仇人同情人講同一番話,就有唔同感覺,佔中者唔係奸淫擄掠殺父仇人,你殺咗佢要接受法律制裁。佢又幫手解釋話,高佬和同何君堯未必真係想殺人,只係一時氣憤純粹發洩。

不過侯強都醒目,同記者講完又補飛,話其他人勇過佢,自己就唔會講咁激進嘅言論喇。佢仲話自己講粗口就叻,後生仔要講粗口就搵佢,唔介意免費教授,因為自己喺三教九流地方長大,講粗口都大把「技術」,最高境界係講完你都唔知佢鬧緊你。記者心諗呢吓真係高,被人鬧完都唔知有人鬧。

周博賢鬧何君堯過火

聲援一百一十七名入獄或面臨審訊政治犯音樂會,星期日喺中環愛丁堡廣場舉行。雖然天文台懸掛一號風球,時晴時雨,但都無阻熱心人士以行動同歌聲支持一班政治犯。音樂創作人周博賢到場聲援,對於近來社會發生嘅事,佢都睇唔過眼。

好似最近城中熱議人物何君堯,周博賢直斥其非,「我都係讀法律出身,都算係半個行家,佢係以好唔恰當嘅身份去講呢啲說話。佢講到殺人、殺豬殺狗、喺戰爭中殺人,完全係過咗底線。」

提到港獨,佢心知實際上冇乜可能,但認為咩議題都可以討論,就算回歸咗都可以討論,何況佢哋冇犯到法。眼見不公義嘅事愈來愈多,佢形容依家係烏雲蓋頂,希望有朝一日會天朗氣清。

同場仲有去年反釋法遊行被控非法集結嘅林淳軒,對於相繼有戰友入獄,自己同樣面對審訊,佢話雖然做好心理準備,但都會發噩夢,佢會珍惜依家僅有嘅自由,多做抗爭。原來佢都有諗過坐監情況,仲輕鬆咁話:「可能練到六嚿腹肌,講真我話減一百磅都真係得!」





周博賢身體力行去到音樂會撐政治犯,仲上台獻唱。





林淳軒已經做好入獄心理準備,仲有諗過坐監之後可能減到磅。

錢志健落場撼葉劉楊哲安

當建制派政黨同政府愈嚟愈緊密合作,加入建制派後嘅出路,已經不限選區議員同立法會議員。好似上個月咁,民建聯同自由黨都有黨員獲委任加入政府。

自由黨嘅陳浩濂鯉躍龍門,由中西區區議員搖身一變,坐上財經事務及庫務局副局長呢個位。其實佢喺六年前區選,已經爆冷贏咗公民黨陳淑莊。前年仲以一千八百幾票,大勝支持佔中「 2047香港監察」嘅陳樹滿,唔知當初選佢嗰一千八百幾名山頂區選民,有冇被陳浩濂背棄嘅感覺?

山頂區議員議席要進行補選,聽講自由黨傾向派出做過政助嘅楊哲安出選;新民黨主席葉劉淑儀,亦自爆有意落場,硬撼自由黨「地盤」。非建制派嘅選情雖然非常之唔樂觀,但據知「 2047香港監察」打算再次派人出選,仲會由召集人錢志健親自落場。聽講佢哋都覺得勝算唔太大,但認為要俾選民有選擇。錢志健就同《壹》仔講點都會落場,仲已經搵咗山頂區選民幫手拉票。





錢志健(前中)係資深對沖基金經理,亦都係當年嘅「佔中十死士」之一。佢上星期出席「 2047香港監察」九月聚會時,透露自己點都會落場。





自由黨陳浩濂加入政府做副局長,觸發中西區山頂選區區議會議席空缺。(《蘋果日報》圖片)

翁靜晶多謝老闆

踢爆假艷尼而街知巷聞嘅翁靜晶,因為要應付定慧寺龐大嘅官司開支,加上又要為定慧寺支付二百幾萬維修斜坡費,連個人退休金同埋兩個女嘅嫁妝都使埋。佢於是決定復出,早兩個月加盟咗張志宇律師行,上星期律師行成立三周年搞 party,一於開支香檳,切燒豬賀一賀佢!

翁靜晶都好識做,當日揸住杯香檳不停話:「多謝老闆!」嘩,乜翁靜晶有老細照顧?原來呢間律師樓當初以人情價,幫翁靜晶打艷尼官司,大家惺惺相惜,翁靜晶幫對方打工,順便幫輕一下定慧寺訴訟費用。

當日好多嘉賓到賀,逼爆律師樓。唔講唔知,原來英皇集團主席楊受成同翁靜晶好老友,人唔到禮都到,楊受成送咗一個大花牌俾世姪女。





張志宇律師行開業三周年,兼歡迎翁靜晶同另外兩位律師加入,特別舉行雞尾酒會,仲切埋燒豬,場面熱鬧。





楊受成送來恭賀翁靜晶嘅花牌,十分之搶眼。

撰文:巫不言

news@nextdigital.com.hk


鍾意就快D Share啦!