吳浩康話齋「心痛便，剪一剪...剪個頭髮變出新人...」，但係套用係無綫前主播余浩宗（Cyrus）身上，就換來被炒嘅後果。
是咁的，去年10年，本身已經向大台辭職嘅Cyrus，離職前就去咗泰國充電，返工前就去恤個靚髮啦，點知就出事喇！一返工就俾袁志偉照肺，話佢髮型有問題，要調佢做通宵更，直至離職為止，搞到余浩宗好唔開心，喺直播新聞到時眼紅紅，最後淚灑直播室，之後仲被炒魷，當時佢接受《蘋果》訪問時，都直認唔會再喺幕前出現。但之後佢又收到大台人事部通知，話唔炒佢，但就叫佢唔使返工、有需要先搵佢，話佢嘅last day就同佢辭職日期一樣。被炒固然唔開心，但Cyrus話最唔開心嘅係佢冇機會同觀眾講拜拜呢！
而當時有Cyrus嘅朋友向《蘋果》爆料話：「佢啱啱去咗泰國玩，一返工就俾花哥(新聞部總監袁志偉)照肺，問佢點解剪咗髮，話佢髮型唔好睇，叫佢要做通宵更，做到離職嗰日，佢好唔開心！」(新聞連結：http://bit.ly/2fij2AQ )
點都好，件事都已成過去，而Cyrus離開主播行列一年，講到將來可會再考慮重操故業？佢話將來嘅事真係冇人會知，但o依家好享受自己嘅工作，又自爆原來讀完書後，曾經喺TVB返過三個月免費工，又喺擸頭公司做過。
Cyrus話：「記得嗰時係周嘉儀訓練我嘅，主要都係因為我懶音多，我都唔知點解嗰時好多字都講唔到，最後做咗3個月我就離開咗，去咗一間擸頭公司度做。」回憶當年喺擸頭公司返工，Cyrus話一日真係見好多唔同嘅人，而且大部份都比佢年紀大，不過佢因為身份關係，都要盡量扮到自己好成熟。佢話：「呢個回憶都幾開心，同埋見到好多唔同嘅人，自己都會學到嘢！」
| 余浩宗去年因髮型被花哥照肺後，淚灑直播室。(資料圖片) | | |
| | | |
| | | |
來源 source: http://hk.apple.nextmedia.com
|
鍾意就快D Share啦！
|
|
|