放棄唔做大律師，轉投幕前嘅林作，銳意要喺娛樂圈有一番作為，佢近日宣佈簽咗畀范振鋒嘅經理人公司3年。日前佢仲孖師妹何彥芷（Stella）一齊搵同門師兄、世界武術賽冠軍鄭仲恒拜師學武，除咗同師妹「動手」之外，佢仲同《蘋果》講下由大律師變諧星嘅心路。
大律師呢個職業畀人感覺專業，不過林作主動放棄呢個職業降呢變「下把」，佢就話：「真正做得大成就嘅人，可以做到喺邊界徘徊，天才蠢才係一線之差，要拿捏、要經驗，要向前輩學習，錯誤難免會有，但唔肯去試，就做唔到大事。」就算畀網民惡評兼dislike，林作都話冇問題：「基本上，我覺得真實中好少人笑我，咁網民不嬲唔理性，網絡世界唔現實。空間要自創，唔係滿足巿場需要，網友鬧嗰段時間過咗，o依家越來越正面，我有時間會睇網友每個留言，我仲會逐個覆，你覆佢哋一兩句，佢哋就淆底，跟住調轉槍頭幫番你。」
林作畀人感覺面皮厚，佢直認之餘，仲話自己係極度厚：「係多年追女仔學返嚟，我冇度過面皮有幾厚，但我未試過對人會怕醜。面唔係咁重要，只係人類生物進化一環，最重要發展到自我，有乜盡量試，唔好怕失敗，唔好怕樣衰。」好多藝人講形象，林作揶揄：「只有香港娛樂圈係咁，西方唔會，香港好多藝人太保守，同佢哋成長背景有關。」講到面皮厚，林作仲話原來佢學習對象係......「我阿媽係我榜樣，佢唔要面係一個極點，我拍馬都未追上。佢成日都令我臉紅，我係跟佢學習。」林話自己唔係EQ高，佢自覺IQ高啲。
至於林作日前忽爆財困，佢就話拍拖追女使費大，林作仲自爆每月使費：「一個月10萬以內，供車養狗食飯出街，同一啲固定支出。」林作閒閒哋月花10萬，冇做大律師嘅佢，做個娛圈新人，真係可以收支平衡？佢話：「差唔多呀，我都冇乜用阿媽張卡，o依家簽咗（經理人范振鋒）OK。喺香港如果想儲錢向上游，o依家仲諗橋。」富二代出身林作仲要阿媽接濟嗎？佢話：「阿媽唔好接濟，搵朋友好啲，最好搵個有錢女搞掂。」單身林作希望獲有米女友照顧，佢話：「阿媽都有介紹，但佢審美觀同我唔同，當中有啲係長輩，有啲係千金。」
場地：FAC
| 攝影：沈健程 | | |
| | | |
|
鍾意就快D Share啦！
|
|
|