2017年10月11日 星期三

感激老公護航!謝安琪唔介意為BB走樣 __,謝安琪,

其實女人生完B後肥咗都好正常啫!(資料圖片)歌手謝安琪(Kay)產女後一直專心湊女,未有刻意收身,但最近卻成為網民攻擊對象。有人刻薄地留言指她變肥兼走 ...


其實女人生完B後肥咗都好正常啫!(資料圖片)


歌手謝安琪(Kay)產女後一直專心湊女,未有刻意收身,但最近卻成為網民攻擊對象。有人刻薄地留言指她變肥兼走晒樣,張繼聰即發表長文護妻,不過反而Kay未有仲意,她回覆東網說:「我生完小朋友都有一段時間,的確冇乜點瘦到嘅。(部分網民)都講得啱,只不過我都覺得呢個風氣,大家好似覺得一個女藝人生完BB要好似冇生過即刻瘦番,其實係幾超乎常人嘅。我自己係好平凡常人嚟㗎啫,要循序漸進去調理,同埋我真係適應緊。我湊小朋友乜嘢都係自己做,同其他媽媽一樣,整嘢食、照顧佢換片、沖涼,摺衫都係我自己接,因為照顧小朋友嘅嘢我想做得足啲,所以喺屋企我真係有好多嘢做嘅,收唔收身嘅重點我真係擺埋一邊,唔係好重視。」

望停止網絡欺凌

Kay又認為自己會慢慢瘦下來,她說:「我都有做運動,但係冇話好嚴竣想去極速減肥。」Kay表示明白大家有言論自由,即使留言批評也是網民的自由,正如她自己也有自由點樣去面對,她說:「我選擇放開啲,唔好咁介意。我都好多謝張先生(張繼聰)佢咁維護我,都好感動嘅。我原本真係唔係咁肥嘅,我原本都幾弗㗎!都係佗BB加埋進補先至會好似吹脹咗啫!多謝佢咁樣維護我,依家承受少少苦楚都係值得嘅。每個人都應該為自己嘅言論負責任,希望各位網友、其他好錫我哋嘅人,唔好過分去攻擊留言評我哋嘅人。我知道網絡世界嘅互相攻擊、網絡欺凌好嚴重,我希望大家唔好太過激動,我覺得我先生佢咁做係出於愛護之心,係一件好唔應該釀成太大痛苦嘅事。亦都希望大家畀啲時間我,我好享受湊小朋友,為佢哋努力,我自己都會慢慢搵時間收身、鍛煉,我老公喺留言都畀咗少少目標我嘅,佢話我將會比以前更弗,呢個係佢真心期望定唔知鼓勵我,咁都畀咗啲signal我、畀咗啲說話我聽,證明我都係要努力,我會加油。」

冇被留言影響心情

對有網指Kay生完小朋友後比之前走晒樣,更覺得「肥肥地」係一件好尋常的事,Kay對此謂:「有啲意見都係好平常,唔需要大家太過互相攻擊,但我亦都明白作為我嘅另一半,佢會睇到呢啲評語,佢會覺得好肉赤,因為佢會睇到我平日照顧小朋友,經歷懷孕階段嘅辛苦、辛勞,幾方面嘅嘢我都好理解,反而我自己最冇乜情緒。」

籲女士勿介意產後走樣

Kay坦承照顧小朋友最初階段是重點,可能有人覺得身形走晒樣是好痛苦,但她並沒有心急,她說:「有人可以為部戲願意增肥幾十磅去做個角色,好多人覺得好敬佩,更何況我唔係為工作,為咗小朋友,係因為懷孕所以肥咗,我好尊重呢件事。我覺得呢個意義好大,係咪應該更加值得尊重,所以我都想同其他媽媽共勉之。如果生完小朋友之後有段時間身形未如自己理想,都唔好太心急,我覺得呢個message緊要啲囉!唔好太畀自己壓力,身體緊要啲,等自己所有嘢都隨住節奏好番,先再去keep fit都未遲。」

承諾會慢慢減磅

Kay更以自身為例,她說:「如果我作為藝人都可以抛開呢啲眼光、呢啲批評,希望其他媽咪更加可以輕鬆啲,生完BB肥咗係唔應該承受咁多惡意批評,如果真係有嘅話,都應該對自己有信心去面對種種講法。如果我咁樣肥豬豬,遲啲透過做運動、節制飲食減番,正如阿聰話齋會fit過以前。呢個先至係勵志故事,大家等睇我呢個勵志故事。」

----------------------------

東網巨星開咗ig喇,大家快啲follow

https://goo.gl/KGuo2N


來源 source: http://hk.on.cc
鍾意就快D Share啦!