掃呢頁CODE去手機

2017年10月11日 星期三

【爆相爆片】科大撐枱腳互餵蛋糕 何廣沛朱晨麗姊弟戀斷正 __,何廣沛,科大,朱晨麗,

大台之前播嘅電視劇《超時空男臣》,令今年29歲、喺劇中飾演小太監嘅何廣沛彈起,有傳佢仲同劇中飾演二小姐嘅朱晨麗日對夜對成功撻着,多場親熱戲假戲真做。不 ...


大台之前播嘅電視劇《超時空男臣》,令今年29歲、喺劇中飾演小太監嘅何廣沛彈起,有傳佢仲同劇中飾演二小姐嘅朱晨麗日對夜對成功撻着,多場親熱戲假戲真做。不過大台有機上位嘅小生買少見少,當紮緊嘅何廣沛,為咗唔想影響上位機會,只好將近1年嘅戀情密冚。

對於戀情,二人之前都死口唔認,兩個月前,何廣沛生日,大男方一歲嘅朱晨麗,忽然貼咗張扮咀何廣沛嘅相,留言話:「生日快樂大個仔啦,生生性性吖!」事後有人問佢哋係咪拍拖,男嘅話自己一直專注事業,冇時間拍拖,女嘅呢,就話咀相只係劇照嚟,仲講笑話如果傳緋聞,即係代表二人演出成功喎。(新聞連結 :http://bit.ly/2kz8ylc )

何廣沛生日嗰陣,《超》劇仲係播緊,就算雙方有互動,都仲講得通,不過套劇早早播咗大結局,再單獨約會撐枱腳,就有啲奇趣囉,加上食嗰陣你餵我一啖蛋糕,我又啜吓你杯熱檸茶咁,就更加可疑咁囉。

日前下晝兩點半,有讀者黃小姐透過《蘋果》「爆相爆片」,喺科技大學飯堂見到戴住黑超嘅朱晨麗,同戴住眼鏡cap帽嘅何廣沛喺度tea一tea,讀者話二人坐得好埋好埋,何廣沛仲不時托住個頭凝望女方,唔係拍拖都冇人信。讀者黃小姐話:「 睇得出佢哋好sweet,不時你餵吓我我餵吓你食枱面件蛋糕,同一般情侶一樣咁甜蜜,最後佢哋仲影咗張自拍。」

事後,傳媒問到朱晨麗有冇同何廣沛約食飯,最初得到嘅回覆係:「日日拍劇好忙,冇時間約人食嘢!」對於佢哋兩個撐枱腳,佢就話:「大家係好朋友,難得嗰日唔使開工,咪約吓食飯見面。」問到有冇機會發展,佢就話:「將來嘅嘢都冇人知,順其自然喇!」

擺喺眼前嘅事實,其實,又使乜等將來呢呵!

(圖片由讀者提供) 何廣沛同朱晨麗上月底俾讀者影到喺科大撐枱腳。(圖片由讀者提供) 係咪拍拖?望吓何廣沛同朱晨麗個姿勢應該有啲領悟(圖片由讀者提供)
仲一齊sweet sweet selfie。(圖片由讀者提供) 呢張咀相,朱晨麗話係劇照喎。 喺《超時空男臣》中,有傳飾二小姐嘅朱晨麗同做小太監嘅何廣沛,咀出真感情。

鍾意就快D Share啦!