賭王四房大仔何猷亨就同舊愛「宅男女神」陳瀅國慶日睇煙花，仲睇到甜蜜蜜笑笑口望住對方，係唔係翻撻？兩位當事人就未有表態，大家解讀佢哋身體語言吧。陳瀅噚晚 ...
賭王四房大仔何猷亨就同舊愛「宅男女神」陳瀅國慶日睇煙花，仲睇到甜蜜蜜笑笑口望住對方，係唔係翻撻？兩位當事人就未有表態，大家解讀佢哋身體語言吧。陳瀅噚晚就出時裝活動就春風滿面心情靚，笑笑口話同猷亨無復合無拍拖，仲係單身。
猷亨就疑似再封盤，佢嗰MIT數學天才細佬何猷君，就同少女標本成員袁紫橋(Coco)數數手指都拍拖就快一年，當時已火速帶埋女友去見四太，兩口子唔係被傳媒影到拍拖，就喺Ig放閃，不過最近二人就好耐冇動靜，本報就發現猷君Ig嘅追隨者入面，unfollow咗Coco，仲刪走咗佢哋嘅相，好似之前同大馬有米千金華倫世亞班主女Kimmy Lim分手一樣嘅「分手兩步曲」，而Coco就仲有follow猷君，不過近月就冇乜佢晒甜蜜嘅相，只係狂post佢一個人做吓運動嘅相。
《蘋果》就搵過猷君問點解unfollow咗Coco同刪走相，佢大方直認已分手：「其實都唔使隱藏，你哋都捉到，兩個人係分開咗嘅，我哋係分咗手嘅。」再問佢分手咗幾耐，同咩分手原因，佢就話：「我哋都分開咗個、兩個月，具體時間我覺得唔須要透露，仲知就分開咗，分手原因有好多，都比較私人，同尊重女方，唔提太多，希望大家明白。」
估唔到佢哋一年唔夠就分手，記得舊年萬聖節仲玩cosplay扮《Suicide Squad》嘅小丑同小丑女，點知咁快就分手，問到邊個提出分手，猷君就表示係和平分手：「分手都可以做朋友，呢句說話係真。」再問佢點解要刪走晒咗所有相，佢話：「既然分開咗，唔應該眷戀之前回憶，所以張啲相delete咗，冇話邊個提出分手既，兩個人係埋一齊若然見到終點咪分開，無話邊個提出分。」最後，問到佢嘅感情狀態，佢表示：「分咗手咪回復單身狀態。」即係，何家公子鑽石筍盤又復牌了。
