張國榮初戀
探熱針
同黃玉郎離婚十一年辛酸倪詩蓓獨力照顧 17歲自閉兒
現年 51歲的倪詩蓓， 80年代初跟哥哥張國榮合作首部電視劇開始拍拖，兩年後分手，之後赴台灣發展， 99年跟黃玉郎結婚，發現兒子 Royce患有嚴重自閉症後，倪詩蓓獨自帶着他到擁有較完善醫療設備的新加坡定居，跟前夫的婚姻也在 06年結束。
單親母親不易為，前年終於不勝負荷身體爆煲，高血壓令她先後進了五次醫院，因為跌傷腳，去年更有十個月要用枴杖。在新加坡生活了十三年，深深體會個人能力有限，成功申請香港寄宿學校後，她又下定決心帶着十七歲，近六呎高的 Royce返港居住，近日更計劃將照顧兒子的辛酸經歷出書，幫助其他患自閉症孩子的父母。
消失香港十三年
十四歲入行拍第一部電視劇，八七年跟鍾楚紅合作電影《金燕子》後，倪詩蓓轉移台灣發展，婚後生活低調，在香港消失十三年的她，為自閉兒再度回來生活。她說 Royce週一至週五上課，週末回家小住兩天，週日晚再送他返宿舍。相比在新加坡長年累月繃緊生活，現在有超過四小時睡眠，還有時間寫書分享照顧自閉兒經驗，算是甩難。
「佢喺屋企住，起身我就開始煮早餐，跟住放水俾佢泡泡浴，之後佢會睇電視等等好多嘢，總之好黐身。每個自閉症情況都唔一樣，佢係屬於比較嚴重嗰種，好似一個大 BB咁，乜嘢都叫住媽咪，我需要好大體力。」她說。
封口不提前夫
多年來獨力照顧兒子，關於結婚、離婚，倪詩蓓都避而不談，就連前夫黃玉郎的名字都沒有在口中出現過，問她這些年， Royce爸爸有無探望兒子，她也極力迴避：「今次望盡量講囝囝嘢，呢啲咁耐年代嘅事，我暫時唔會再講。」
自小喜歡煮飯夢想做平凡師奶，甚至想像第一胎生女而改定名，以為唾手可得，偏事與願違，婚姻並不如她所期待：「都無辦法，我先前俾囝囝啲相你睇，細時佢真係可愛兼幾靚仔，突然話佢唔識講嘢，我又係一個自小養起頭家，幾硬頸嘅人，我最初唔相信，覺得只要努力上多啲治療課程就會好番。」
長腿模特兒
倪詩蓓原名倪文娟，是模特兒出身，因身材高䠷，樣子甜美，很快被招攬入麗的電視（亞視前身）成為當家花旦，代表作有《對對糊》、《甜甜廿四味》，亦因此與同劇的張國榮擦出愛火，成為哥哥的初戀。張國榮曾形容與倪詩蓓的戀情是最難忘的純愛。
與哥哥分手後， 85年有傳倪詩蓓與湯鎮業相戀，兩人關係亦在 87年結束。之後認識前夫黃玉郎，於 99年下嫁給他並育有一子，婚後倪詩蓓變得低調，惜婚姻生活於 06年告終。
撼頭埋牆
由零到成為半個專家，甚至在新加坡跟朋友合資開辦專為自閉症兒童而設的 play gym，她說為帶兒子周圍去，準時三點收工，參加當地為特殊兒童而設的戶外活動。
「佢哋好需要活動，唔可以困住，上完堂就帶佢不停玩、游水。我希望呢本書能夠幫到人，譬如小朋友發脾氣抓傷自己，有小朋友嚴重到去扯人頭髮，當自己好無助時乜都試過，無論係物理、運動定語言治療，甚至去拜神。 Royce都試過成日打自己個頭，甚至撼頭埋牆；有段時間，佢不停抓傷自己隻手，我就幫佢對手戴白襪，雙手仍然可以活動，但就無手指抓傷自己，開頭佢唔鍾意，但我唔俾佢除出嚟，慢慢就戒咗，但都要兩三個月。」她說寫《我的寶寶來自外星》（暫名）是關於二人的奮鬥故事，在台灣推出，收入撥捐慈善機構。
出入醫院
兒子 Royce有她陪伴照顧，這些年，她卻以不停吃來支撐自己。前年身體出現問題，她才開始節食減磅，至今減了三十磅。
「相比一年前，我已經減咗 14kg，如果你一年前見到我，我仲似一個波。人要放鬆自己就買好多嘢食，係咁食。一年前身體出現問題，都入咗幾次醫院，有一日突然打冷震，我記得好清楚由頭殼震到落腳底，我打電話俾朋友求救時，講嘢都打晒冷震，入院後先知有血壓高，我記得入院時係一百九十幾，醫生話其實好危險，因為中風或者有問題都因為血壓高，都唔知情況咁嚴重，而家開始煮番一啲健康嘢食。」她說。
治療黃金時間
六歲是治療的黃金時間，自閉症兒童有機會痊癒入讀普通學校，日子一天一天的過去， Royce未有進展，她遂將希望放在十歲，因她見過有自閉童十歲前突然說一大堆話例子， Royce滿十歲，她沒有再給自己任何期望。
「我一直努力，努力到佢十歲後就放鬆自己，唔再去諗好與唔好嘅嘢，只係諗點樣去過開心日子，教到佢自己能夠做嘅嘢…"」畢竟，照顧孩子，是媽媽一生的職責。
踢拖拍拖
倪詩蓓跟哥哥合作電視劇《對對糊》撻着，拍拖唔夠兩年分開，有指她是哥哥的初戀，連她也不肯定。對於逝世多年的男友，她記得都是開心事：「我哋嗰時出街唔驚俾人見到，放咗工，佢着人字拖，兩個人去街邊食嘢、睇戲，啲人見到我哋，仲問係咪真係拍拖。我好細個就鍾意食意大利餐，每個禮拜會去中環一間意大利餐廳。拍拖兩年唔夠，我去台灣發展，大家好自然分開咗，返嚟香港，應該喺 coffee shop撞過一、兩次。」
撰文：娛樂組
攝影：蕭敬漁
場地提供：嘉里酒店
|
鍾意就快D Share啦！
|
|
|
