掃呢頁CODE去手機

2017年11月16日 星期四

拍戲任攬,老公心急要 B岑麗香請假出外造人 [壹週刊 - 1445] __,岑麗香,M1,

香香和黃浩然在新劇《果欄中的江湖大嫂》中飾演情侶,早前二人現身果欄拍外景時入戲地攬到實。探熱針拍戲任攬,老公心急要B岑麗香請假出外造人即將三十三歲的岑 ...






香香和黃浩然在新劇《果欄中的江湖大嫂》中飾演情侶,早前二人現身果欄拍外景時入戲地攬到實。

探熱針

拍戲任攬,老公心急要 B岑麗香請假出外造人

即將三十三歲的岑麗香去年 12月和金融才俊 Joshua(強強)在溫哥華拉埋天窗,為了可以同香香日對夜對,老公甘願放棄加國事業,移居香港遷就老婆。下月將踏入結婚一周年,為了騰出空檔同老公去旅行慶祝周年紀念,最近香香可謂搏到盡,日日做到無停手,趕工完成手頭上工作,造人大計隨時 ready!早前,岑麗香、陳煒及黃浩然現身油麻地果欄為劇集《果欄中的江湖大嫂》拍外景,附近唔少麻甩佬金睛火眼望實,雖然著住背心露臍裝嘅人妻香香冇老公喺身邊保護,好彩仲有「偽男朋友」黃浩然請纓做護花使者!







香香和老公強強下月將踏入結婚一周年,成為人妻嘅香香拍劇有親熱戲當然要得老公批准。





香香背心露臍裝上陣,即引來果欄附近唔少麻甩佬望到實。





天氣炎熱,貼心嘅香香吹風扇為拍檔陳煒降溫。





香香唔理旁人目光,坐埋一邊專心睇劇本。





黃浩然請纓做護花使者。





香香同拍檔以趣怪生果造型大鬧果欄,場面好搞笑。





婚後的香香做到無停手,早前播出的《老表,畢業喇!》同蔡少芬及郭晉安不乏對手戲。

婚後照拍嘴戲

岑麗香婚後無停手,劇接劇為《溏心風暴 3》及《果欄中的江湖大嫂》開工,好彩老公強強好體諒,仲朝朝做柴可夫送老婆去開工。而且強強唔介意老婆在《果欄中的江湖大嫂》同飾演情侶的黃浩然有嘴戲,成為人妻的香香依然搏到盡唔使封嘴,不過香香就話事前已經同老公交代,老公都批准咁話。日前劇組在油麻地果欄為劇集拍外景,著住背心露臍裝嘅香香未埋位前坐埋一邊讀熟劇本,果欄附近大把麻甩佬在工作,見到靚女當然會牛咁眼望到實,面對住咁多對進擊的眼睛,專業的香香實行借咗盲探隻眼一於少理,相反身旁的黃浩然就緊張地請纓做護花使者,用自己嘅身體為香香做掩護,正式埋位時,培養好情緒嘅岑麗香同黃浩然非常合拍地攬到實,輕輕鬆鬆就完成這場大結局戲份。





今年七月,老公強強飛去葡萄牙陪香香拍《溏心風暴 3》,拍完戲兩公婆逗留當地搵專業攝影師為二人留倩影。





最近香香谷出三吋事業線出席阿姐晚宴,又自爆有同一班姊妹討論性事,自己亦有準備性感內衣益老公。





強強錫到香香燶。





強強以「公主抱」實老婆,好 sweet。

跟得老公

其實香香同強強都愛得好痴纏,好似今年七月,香香飛葡萄牙為劇集《溏心風暴 3》拍外景,強強做埋跟得老公飛埋過去陪佢開工,拍完劇兩個仲留喺當地享受二人世界,順便當度蜜月,為了造人大計,香香趕工完成手頭劇債,今年底終於可以放假陪老公。「本身香香都想做多兩年嘢再搏殺吓先諗生 B,但係佢同老公嘅屋企人成日催佢哋快啲生,加上見到身邊嘅朋友好似嘉欣有咗小朋友生活變得好開心好圓滿,所以香香都改變主意,依家開始已經睇中醫,養好身體隨時 ready生 B!」身邊好友透露。





上月尾,香香趁劇集煞科,即同老公飛去溫哥華玩足十日。





老公逗留當地探親,要回港工作的香香一條友返港後,一落機即向老公報平安。





香香在《溏心風暴 3》和王浩信做一對,二人不乏嘴戲。





《溏心風暴 3》即將播出,香香完成宣傳便放假與老公外遊。

旅行不設防

現在終於拍完晒兩套劇,吊頸都要抖吓氣,當一完成《果欄中的江湖大嫂》戲份後,岑麗香隨即同老公飛去溫哥華旅行順便探親,享受完二人世界,老公多逗留幾日陪吓屋企人,至於要趕返香港工作的香香就在上月尾(三十一日)單獨回港,雖然老公未能一齊返港,但他都體貼安排司機接送老婆,一落機香香就機不離手不停發訊息,相信都係同老公報告行蹤。下月便是香香和強強的結婚周年紀念,喜歡周遊列國的二人已經一早安排外遊慶祝,實行不設房展開造人計劃。「佢兩公婆一有時間就會安排去旅行,佢哋話希望喺生 B之前爭取多啲旅行機會,因為有咗小朋友就會困身好多,而佢哋而家已經係不設防!」知情人士透露。

趕造人

藝人大部分都遲婚,所以個個婚後都不設防,趕住造人,不少人一年內已經成功生 B。



楊愛瑾郭永淳

去年四月下嫁永安太子爺郭永淳,結束八年愛情長跑,同年十一月初在 Ig留言:「 Hey little thing, you make us go wild!」宣布造人成功。

孫慧雪羅天彥

去年與拍拖六年的圈外富二代羅天彥拉埋天窗,兩個月後,即在社交網站宣布懷孕,上星期,孫慧雪為囝囝 Riley慶祝百日宴,更上載一家三口合照。

官恩娜 Juan

15年初,與中法混血醫生 Juan於香港舉行婚禮,官恩娜婚後火速造人,同年 10月,誕下囝囝 Garbiel後,近日 Ella再度報喜,似乎未有復出打算。

Yumiko梁學儲

14年,與梁學儲結婚,同年宣布造人成功,誕下女兒並改乳名「梁浸浸」,早前, Yumiko收千萬酬勞帶埋囡囡拍內地真人騷,梁浸浸人氣急升,星 B身價急漲。

撰文、攝影:娛樂組


鍾意就快D Share啦!