梁錦松（左）星期六鞠躬向曾經得罪過嘅人道歉。其實譚志源（右）亦曾喺電台承認，當時身為阿松嘅新聞秘書，冇提醒佢買車或涉利益衝突。
八卦陣
「沙塵」梁錦松向公務員鞠躬道歉
早排前財政司長梁錦松，同前政制及內地事務局長譚志源，為咗幫一個佈道會造勢，拍咗條叫《車主》嘅片。片中扮司機嘅阿松仲攞當年「偷步買車」事件抽自己水，佢同《壹》仔講，原來條片嘅主題係由佢提出，「我做司機，譚志源做老細。第一就得意啲，第二就係以型格嚟講，佢似老細啲，我就比較似低下階層嘅司機。」
上星期六，阿松同譚志源喺大球場上台分享點解信耶穌，阿松再一次抽自己水：「你都知我好冇記性。」譚志源就投訴，當年做阿松嘅新聞秘書，感覺佢雖然係行政會議成員，但之前未做過政府官員，覺得佢做官「似乎有少少好『沙塵』嘅感覺！」譚志源仲話，阿松把口成日好寸，「成日窒我哋啲公務員」，搞到佢間中要幫手同其他政務官解釋，話阿松其實冇心。
譚志源同阿松最近「再續前緣」，加入由阿松創立嘅新風天域集團，做醫療副主席同教育主席。佢話老細份人依家謙虛咗，亦和藹可親咗。阿松都即場向譚志源、一班前公務員同事、同埋好多曾被佢「糟質過、寸過嘅人」道歉。佢仲嚟咗個九十度鞠躬，睇嚟佢當時真係得罪唔少人。
選人大代表港人？譚志源耍官腔
港區人大選舉星期一截止報名，人大常委范徐麗泰同港區人大代表團團長譚惠珠，都話今屆唔再選，上位嘅自然係盛傳獲「祝福」嘅人，包括星期六喺台上意氣風發嘅譚志源。
《壹》仔問佢覺得自己能唔能夠代表香港人，譚志源就耍晒官腔咁話：「根據個制度，人大代表係需要向佢所屬選區嘅選民收集意見，然後喺人大場所裡面反映出嚟。如果我成功當選，我會將香港人對國家發展，同埋對中央同特區關係嘅睇法同意見，喺人大嘅平台裡面，向相關部門反映。」
不過身為前「政改三人組」，譚志源都話願意幫手推動重啟政改，「去穿針引線，中央負責香港事務嘅官員同埋各個主要政黨嘅代表，如果都係有咁嘅意願（重啟政改），我係願意好似我以前做局長咁，幫手協調一啲會面。」
至於譚志源嘅老細梁錦松，雖然冇出嚟選人大，不過都仲幾關心香港社會，特別喺創新科技方面。佢同《壹》仔講，「 Uber我覺得可以考慮，點解唔俾 Uber喺香港？共享經濟係全球趨勢，當然亦都要照顧依家嘅持份者，但係呢個平衡點樣去取捨？你唔能夠因為要照顧依家有啲既得利益者，就讓創新唔喺香港出現。」
劉鳴煒賴議員，冇為學生發聲
政府十月底推出青年委員自薦試行計劃，招募十八至三十五歲青年加入禁毒、公民教育等五個委員會，截至上月底收到一千一百七十六份申請。有團體批評，青年發展委員會得三名青年成員，對委員會決策影響有限，又批評計劃遴選權喺一小撮家長手上，缺乏廣泛代表性。
本身係招募委員會成員嘅青年事務委員會主席劉鳴煒，上星期出席電台節目，被問到如果有學運領袖，例如岑敖暉報名，會唔會揀佢。劉鳴煒話應徵者就算係社運人士，如果有表達同分析能力，「 why not呢？」講到好歡迎佢哋咁，但最後揀花瓶定有心人入委員會，咪又係政府話晒事。
有中學生話學校好少涉及政治議題，就算學生喺校園發表政見，政府都唔會聽到。劉鳴煒就回應話，立法會議員同區議員應該代表佢哋發聲，又話近年政治代理人制度失衡，如果佢覺得意見冇辦法上達政府，應該問點解議員冇幫手。
不過現實上，點解議員未能代表市民，相信都唔只係因為節目主持話比例代表制嘅問題、同埋議員公務繁忙咁簡單。上年幾名本土派、自決派人士當選立法會議員，但之後因為人大釋法加上政府提出司法覆核，搞到議席被 DQ。劉鳴煒咁講法，係咪曲線挑戰緊人大先？
田二少玩實測，力撐網約車平台
消委會最近發表研究報告，建議政府循序漸進開放「網約車」市場。實政圓桌立法會議員田北辰表示支持，認為政府需要擱置同傳統的士客源重疊嘅專營的士，仲話世界各地都興起網約車，如果香港冇，實會俾人笑。
報告出咗第二日，田二少嗱嗱聲上載咗段片上 facebook，話支持 Uber合法化。佢喺片中話放工喺立法會門口等咗半個鐘，都截唔到一架的士，「都唔知的士站起嚟做咩」，仲分享俾的士拒載經驗。
田二少建議政府將優質的士概念改一改，將點對點租車合法化，再發牌監管，學外國分番開的士同 call車平台兩個市場。而且要有兩、三個競爭對手，唔好俾 Uber壟斷，又建議車廂內加裝閉路電視，方便公正咁處理乘客投訴。
相信唔少香港人都受過劣質的士司機嘅氣，所以好多人讚田二少有見地。有已經唔敢揸 Uber嘅司機同《壹》仔講， Uber即刻食住個勢，向司機發出電郵話認同消委會建議，希望政府同業界持份者一齊商議合適嘅制度，仲點名話多間網媒同報章，都對呢件事有正面報導，相信想挽回流失司機。
撰文：巫不言
|
鍾意就快D Share啦！
|
|
|