中環人語
莊偉忠話金錢係萬惡之源
廉署上週與證監會聯合調查康宏環球（ 1019），震動整個股壇。不少人對主席王利民被捕，無不搖頭嘆息。成件事大家覺得康宏金融行政總裁莊偉忠，最為捉蟲。事關莊偉忠之前在一田百貨做 CEO時，省到自己個招牌鬼火咁靚，去年他以退休之名離開任職 8年的一田，但小休了三個月，又離奇於去年八月復出加盟康宏。
當時莊偉忠自稱同王利民喺政治和管理上的想法好相似，故一拍即合，搵佢返去主要係做資源分配和創新工作。點知莊偉忠起跑半個月便心臟病發，抖了個多月才復工，他笑稱「從鬼門關走番上陽間」。
其實佢都自爆被人質疑識鬼搞金融，不過大家唔使擔心，佢老兄曾有份創辦安信兄弟，可惜有時「信錯兄弟」，生招牌「花」咗少少。小宗睇佢面書會否發表「從陽間折返鬼門關」的文章，點知佢只寫着：「生不帶來，死不帶去，金錢係萬惡之源，少掂為妙！」呢個 post，在副主席馮雪心被廉署帶返總部調查前三日出街，難道已聞到𡃁味
支付寶反攻日本
小宗最愛周圍去「體察民情」，內地今期流行唔帶錢出街，街邊的小攤檔也可用微信或支付寶。有位小姐話之前去街邊小食檔打算俾現金，老闆話唔好啦懶得找贖，叫佢用微信俾錢算數。有位男士身上完全唔帶現金，仲話維持咗半年咁耐！事實上，大陸連無人便利店都有，你話幾先進呢！
呢股強國風仲吹到去日本，日本除咗聘請大量中國留學生做店員，依家仲引入埋強國最「引以為傲」嘅「支付寶」同「微信支付」！行經大阪道頓堀，好多間鋪頭喺門口都戙晒「歡迎使用支付寶」嘅水牌，仲用晒簡體字介紹點樣使用，有晒優惠。其中一間出名做遊客生意嘅電器鋪 Bic Camera，喺門口仲大大隻紅色簡體字寫住「省時、免費、省力」，啱晒強國人心意。
小宗口痕問吓強國遊客，點睇支付寶引入日本，原來唔少人都係第一次用。李小姐指用法同強國一樣，好方便。有藥妝店店員就話，引入支付寶之後，生意明顯好咗。但有當地學者意有所指，運行咗幾個月仲未影響到當地人消費習慣：「我們喜歡現金，因為日本非常重視安全。」睇嚟同志仍需努力囉！
大媽撐孫大倫公子
中港照相器材集團（ 1123）主席孫大倫的大公子孫道弘（ Stanley），上週四以集團副主席身份，喺貿發局於會展舉辦的「社交媒體搵新客」研討會演講，太子爺開咪前五分鐘已準時到場，不過一班操普通話的國內大媽大叔比孫道弘仲早到！依家啲大媽大叔真好學，香港人係咪要學吓？
Stanley提到在社交平台上用動畫、遊戲、搞工作坊、甚至同迪士尼合作，喺樂園內搞《紛 Fun拍同樂日》，加埋用傳統媒體一齊 generate buzz。佢更留意到公司有本相簿的落單情況是這樣，「 95%嘅人喺網上落單，但差唔多百分之一百嘅人喺鋪頭攞， online和 offline都可以幫到鋪頭生意，因為你喺鋪頭時，職員可以介紹當時嘅 promotion，好多人說網上零售會抹殺 shop retail，其實可以互補不足！」講到 online，都係要靠第二代啲後生仔喇！
葉簡明挖角搶金融人
前局長肥平何志平响花旗國涉嫌賄賂非洲官員，呢單嘢睇怕有排搞，不過外界更關心肥平何以走上國際舞台呢。
是咁的，肥平近年加入香港中華能源基金會做高層，背後金主係強國千億富豪葉簡明。年僅 40嘅佢發跡勁神秘，自稱讀初中已經係萬元戶，靠呢筆錢左投資右搞生意，八十年代開創華信集團，漸漸愈撈愈起，成為中國冧巴溫民營能源企業，一四年開始連續三年成為世界企業五百強，據報葉簡明身家過千億。
而佢最近亦染指香港金融業，早前買殼入主時尚環球（ 1520），十月正式改名「香港華信金融」，不過佢老兄自己冇坐入局，繼續遙控操作。知情人士話葉生好想大搞金融業，已收購一間只得 9號牌細資產管理公司，但依然嫌未合心水，就算爆出肥平單嘢，仍無損佢心情，繼續挖角請人，目標係齊牌開檔食大茶飯。
小宗聽聞華信已成功喺幾間中資行搶人，公司設喺華信老巢灣仔會展中心辦公大樓，華信幾年前密密掃入該處物業，賬面睇已贏到開巷。
瑞銀淡友反手唱好利豐
瑞銀分析員 Spencer梁裕昌幾年前唱淡利豐（ 494），更與利豐管理層隔空筆戰，若以成敗論英雄，梁裕昌算係一炮而紅，事關利豐股價狂瀉，由十幾蚊跌到兩個幾，更加被剔出藍籌行列，難怪有利豐中人講笑話，史賓沙•梁對利豐嘅影響力，比史賓沙•馮（馮裕鈞洋名、利豐第四代話事人）更大。
梁裕昌喺加拿大讀大學時，本科及碩士都讀電子工程，但入行做分析員卻專責睇零售及出口股，容易數吓生意額，起碼有個底。而佢除咗唱淡利豐之外，幾年前亦唱淡依家已經私有化嘅百麗同達芙利（ 210），結果雙雙股價都每況愈下，史賓沙亦成為知名淡友。
但上星期佢反手出報告唱好利豐，由於佢被公認為對利豐有獨特見解，條街好多人跟衝喪追，結果股價急升。有利豐內部口痕友仲話，搵史賓沙•梁取代太子爺的話，股價可能急升更多，有助大閘蟹鬆綁。
|
鍾意就快D Share啦！
|
|
|
