【新增內容】文詠珊（JaniceMan/JM）今日凌晨喺微博貼文寫，「昨天從芬蘭轉機到聖彼得堡，我的五件行理全給芬蘭航空Finnair弄丟了。所有的禦 ...
【新增內容】
文詠珊（Janice Man/JM）今日凌晨喺微博貼文寫，「昨天從芬蘭轉機到聖彼得堡，我的五件行理全給芬蘭航空Finnair弄丟了。所有的禦寒衣物和生活用品都在行李中，未來的兩星期在北歐都不知道怎麼過渡，而芬蘭航空只回覆一句「不清楚」。 這是一個合理的回覆嗎？ 」
同金融才俊男友吳啟楠（Carl）趁聖誕外遊嘅JM，今日回覆《蘋果》，身在聖彼得堡嘅佢話：「係全部行李冇晒，一件都冇，我係準備去睇北極光，由芬蘭轉機去俄羅斯，五件行李冇晒，一件都冇，芬蘭航空一句回覆都冇。」
JM又話，除咗佢哋，同行至少有6、7人都冇咗行李，「噚晚咁啱撞番同機3個美國人，佢哋都話未搵得番，但航空公司只係話No Information，又唔聽電話。」JM嬲爆話：「真係太過份，太誇張，我都好少會咁寫出嚟，但真係覺得好匪夷所思，追佢哋（航空公司）就表現好唔耐煩，一係就電話打唔通。」
聖誕去旅行本來開開心心，但因為唔見行李搞到唔開心，JM話：「如果去日本都唔驚，但今次我準備去睇北極光嘅Full Gear冇晒，連啲糧食都冇晒，暖包都冇，呢度又買唔到，所以我已經凍到病咗，噚日先買番個喼，依家準備上機喇！」
JM目前準備在聖彼得堡飛回芬蘭，上機前再喺機場向航空公司職員追問行李狀況，終於有一位負責行李部嘅職員現身，指行李喺芬蘭冇上機，所以佢一陣飛抵芬蘭嗰陣就會搵得番啲行李。
稍後，JM再透過短訊補充：「唔見行李後仲有小插曲，無晒啲行李之後，我哋即刻去買衫同埋日用品，期間我幾乎又被人偷嘢，個背囊已經被人打開咗一半，好彩發現得早。」佢又話：「都幾驚，佢哋係4、5個人有組織咁做，如果唔係發現到，連銀包同證件都無埋就慘喇！」
更多娛聞，喺晒《娛果》
http://fb.com/appledailyent
