洪天明日前被爆在上海背老婆周家蔚媾女，與辣妹夜蒲後手拖手返酒店。一直未有現身的周家蔚昨午終蒲頭，她離開寓所時表示對天明信任，又力撐老公說：「純粹一場誤會。」之後天明由內地返家時，亦強調是誤會：「我冇對我太太做出任何背叛嘅嘢。」並向所有關心他的人說：「對唔住！」
洪金寶長子洪天明與前港姐亞軍周家蔚於12年拉埋天窗後，先後誕下兩子，一家四口本幸福美滿。不過，上周三（13日）有台灣周刊爆料，指有讀者於本月9日在上海新天地酒吧目睹天明與一名辣妹於夜店狂歡，之後兩人更手拖手到日航飯店過夜。
天明在昨日出版的周刊訪問中，承認事件令周家蔚不開心，雖然暫未有影響婚姻關係，但太太對他的信任難免受影響。另方面，天明所屬經理人公司銀河海潤接受內地傳媒訪問時，就指天明當晚是飲酒累事，由於天明不勝酒力，該女子好心扶他，扶扶吓就「順勢」拖手，強調二人甚麼事也沒發生。
「冇做背叛嘢」
事發後，本報記者連日來在天明位於將軍澳村屋寓所守候，但一直未見蹤影，直至昨日，兩人分別現身。家蔚於下午二時半離開寓所，見她手戴鑽戒，雖然已化妝，但樣子看來甚疲累。問與天明現時關係如何？家蔚笑說：「OK呀，冇乜特別，純粹一場誤會。」對於老公拖女入酒店？她說：「誤會囉，飲醉酒，純粹誤會。」是否百分百信任？她說：「信任，佢𠵱家喺內地返落嚟，等佢再講啦。」
在家蔚離家一個多小時後，戴上黑超的天明由司機接載乘坐七人車返抵寓所，樣子看來十分疲累。對於拖女返酒店事件，天明跟太太口徑一致，指是一場誤會：「冇乜特別回應，因為呢件事唔係大家想像咁差嘅嘢，一場誤會囉。但睇到影響都幾大，啲網民已經當咗件事，係嗰種諗法，一定係標題嗰樣嘢啦。真係誤會囉，我就冇對我太太做出任何背叛嘅嘢，最重要我屋企人信先啦，同埋朋友都好支持。我再一次多謝大家嘅體諒，見大家其實都辛苦啦，都唔算push得我好犀利。我唔想回應係因為覺得件事唔係真嘅發生嗰件事，唔係咁壞嘅事情，我覺得唔需要再回應，所以我就冇回應到。今次解釋，講完後唔好再影響我屋企，我都有檢點嘅地方，有地方要去change，向所有關心我、所有朋友交代一聲，講聲對唔住。」
「鬧我我理解」
最後天明提到網民留言批評，他說：「我都理解大家睇新聞會諗出個咁嘅結論，但希望大家唔好睇表面，就諗出個判斷就去咗死刑。讀者為我太太而出氣，即係喺啲網上面去鬧我嗰啲我理解嘅，因為佢哋可能會戥我太太唔抵，去發洩，但有啲係好離譜嘅說話，甚至乎係鬧埋我太太，鬧埋我屋企人，希望大家可以三思諗清楚，自己講乜先。」
採訪、攝影：黃曉程、羅德光
|
鍾意就快D Share啦！
|
|
|