每逢年尾，政府都會公布各個委員會嘅新任命名單，今日(22日)就宣布廉政公署4個諮詢委員會大執位，最觸目嘅，梗係縱橫政圈數十年、人稱「珠姐」嘅基本法委員會委員譚惠珠(珠姐)，唔再續任審查貪污舉報諮詢委員會(審貪會)主席由於珠姐做咗審貪會主席只有3年，一般會做2屆共6年，她突然唔玩，立即惹來各方揣測。不過，無論如何，珠姐在任期間，廉署成功檢控前特首曾蔭權爵士並定罪判囚，現時離開都可算是功成身退。
其實珠姐啱啱喺本周三(20日)先至出席完廉署嘅年終記者會，當時佢仲話自己加入審貪會已經8年，擔任主席亦有3年，但就隻字不提自己唔再續任主席，所以有關離任消息傳出後，都惹來各方揣測。不過大家唔使估喇，據了解，今年72歲嘅珠姐係自己決定唔再續任嘅，她之前已經放棄角逐連任港區全國人大代表，可能真係想抖下。
珠姐做咗審貪會主席3年，期間廉署落案檢控嘅最大單案件，莫過於曾蔭權擔任特首期間，未有向行政會議申報佢與雄濤廣播主要股東黃楚標商議租賃對方名下深圳東海花園豪宅，被控公職人員行為失當等罪名喇。話說呢單轟動全港嘅大案，廉署2012年接手，調查咗3年8個月之後，即係珠姐2015年做咗審貪會主席幾個月先至正式落鑊，真係有咁啱得咁橋。
結果曾蔭權今年2月在高等法院原訟庭被裁定一項公職人員行為失當罪名成立，被判監20個月，而佢服刑2個月後，獲准保釋等候上訴，案件定於明年審理。就係呢個時候，珠姐唔再續任審貪會主席，都可謂功成身退。至於審貪會主席一職，會由前政府高官鄧國斌接任，任期明年1月1日生效，為期2年。現年65歲嘅鄧國斌，1974年加入政府，曾經做過保險業監理專員及審計署署長，於2012年退休。
另外，政府今日亦宣布委任黃冠文做防止貪污諮詢委員會主席，接替區嘯翔；至於貪污問題諮詢委員會及社區關係市民諮詢委員會主席，則繼續由周松崗及唐偉章續任。
|
鍾意就快D Share啦！
|
|
|