2018年1月18日 星期四

阿仔扭眼瞓郭晶晶出「踎」功絕技 [壹週刊 - 1454] __,郭晶晶,M1,

Lawrence扭眼瞓,晶晶踎低做人肉梳化。探熱針阿仔扭眼瞓郭晶晶出「踎」功絕技來港五年仲未改到跳水皇后郭晶晶12年嫁俾霍啟剛做少奶奶,婚後積極跑數, ...






Lawrence扭眼瞓,晶晶踎低做人肉梳化。

探熱針

阿仔扭眼瞓郭晶晶出「踎」功絕技

來港五年仲未改到

跳水皇后郭晶晶 12年嫁俾霍啟剛做少奶奶,婚後積極跑數,目標生夠三個,要同奶奶朱玲玲平手。上年 4月,細女霍中妍( Laurissa)出世,湊個「好」字,睇情況好快達標。

每逢有長假期,霍氏一家例牌出埠,早排又見到佢哋一家四囗加埋晶晶媽咪,飛東京玩足十日。回程時,玩到冇電的霍小公子中曦 Lawrence狂扭眼瞓,晶晶冇晒符,惟有使出祖國絕技「踎功」,踎低做阿仔人肉梳化,仲俾途人眼望望,搞到晶晶鬼咁尷尬!估唔到晶晶來香港嫁入霍家五年,都仲未改到呢個強國習慣。







踎足十分鐘,輪到晶媽接力,原來晶晶「踎功」係深得阿媽真傳。





出閘時, Lawrence雙腳唔肯着地,要爸爸抱。





兩母女當街使出祖國「絕技」,路人行過都忍唔住眼望望。

B女包到冚

一向貼地的霍啟剛,出埠從來唔帶工人,服侍老婆、仔女一腳踢。玩足十日,大仔 Lawrence冇晒電,雙腳唔肯着地,要老豆抱住出閘,行李惟有交俾機場職員代勞。另一邊廂,負責孭住細女的郭晶晶,從另一邊箭步出閘,身邊仲有媽咪傍住幫手湊 B。

撞啱假期閘囗人多,郭晶晶早有準備,用被仔將 B女包到冚,自己再用雙手攬實,確保 B女個樣唔會曝光,兩公婆前後腳急步行去停車場,不過司機遲到,要一家五口呆等。





晶晶負責孭住細女,用被仔包住,箭步行去停車場。





早前霍氏一家四口出發東京,玩足十日。

兩母女輪住踎

呢個時候,霍小公子 Lawrence開始唔耐煩狂扭眼瞓,為了要氹阿仔,晶晶惟有在大街大巷使出她的看家本領——蛤「踎」功,踎低俾阿仔做人肉梳化,踎足五分鐘,晶晶都完全冇腳軟,果然功力深厚,不過晶晶媽見阿女踎得耐,怕阿女腳軟,自己主動接力,踎埋一份抱孫仔坐上大髀,等晶晶可以抖一抖,原來晶晶係深得阿媽嘅真傳,唔知第二時中曦同中妍會唔會都好踎得呢?

兩婆孫踎正喺路中心,有路人行過,都忍唔住眼望望,搞到晶晶勁尷尬,即刻拉起阿仔,等多一陣,司機終於出現,郭晶晶抱住阿仔火速跳上車,霍啟剛繼續善後,落手落腳搬行李上車,最後仲好識做俾埋「貼士」機場職員先鬆人。





做慣阿四的霍啟剛,落手落腳搬行李。





兩公婆拍拖去睇戲,晶晶著住國旗風褸,果然熱愛祖國。





產後九個月,晶晶完全冇收身,下身勁好肉地。

產後唔收身

早前霍啟剛出席活動,講到郭晶晶時即刻冧笑話:「多謝太太五年生了兩個小生。」仲話一定會「順其自然」繼續生。 B女出世八個月,早排見到晶晶拖住大仔 Lawrence行超市,一條緊身藍色 legging,從後面睇足足比以前脹足幾個碼, pat pat同大臂勁多肉,產後完全冇收身打算,睇嚟隨時準備迎接第三胎。





出名貼地的霍氏,早前一家三口出動去葵芳港鐵站賣旗。





買完糖, Lawrence開心到跳吓跳吓。

強國味濃

由跳水到嫁入霍家,郭晶晶已經來港多年,但大媽味一直唔散,踎地捽腳,全部做齊。





踎功一流

16年,郭晶晶一家三口陪外婆到數碼港草地野餐,其間晶晶以國內大媽最強姿勢,擘大雙腿踎低在囝囝中曦面前飲食,足足五分鐘無換姿勢,踎功相當了得。





除鞋捽腳

當年隨奧運國家隊來港,郭晶晶被拍到除鞋捽腳,強國味甚濃。





衣著老土

作為豪門新抱,郭晶晶從不打扮,出席公開活動都非常樸素,被網民狂踩她衣著老土兼唔識高貴,早年,與霍啟剛參加大閱兵時,她只拎住數千元的 Longchamp。

撰文:娛樂組 

攝影:陳亦龍 


鍾意就快D Share啦!
Related Posts Plugin for WordPress, Blogger...