宣萱
豪語錄
雲淡風輕
離開無綫 5年，去年回巢接拍頭炮 4K劇集《不懂撒嬌的女人》。宣萱將劇內 Mall姐一角演活，創出入行 25年的事業高峰。論演技，宣萱不用置疑，論回響，《不》劇掀起的熱話是全年之冠，如果民選宣萱為今屆視后，相信不會惹來爭議。
對於一向不是「相對論」的無綫頒獎禮，她沒抱任何期望，「有無都無所謂。」說時不溫不火，雲淡風輕，最緊要是快樂自在，是宣萱的生存之道。
心態好隨緣
去年，無綫播映的劇集《不懂撒嬌的女人》掀起城中熱話，令久違了的追劇潮再現，女主角宣萱飾演的 Mall姐入木三分，應記一功。即將舉行《萬千星輝頒獎禮》，對於今屆視后，宣萱說機會不大，「因為已經攞咗馬來西亞嗰個，再攞埋第二個嘅機會其實係低啲，好老實講。（打定輸數？）心態好隨緣，有就更加開心，無亦都無乜所謂，其他人攞到一樣戥佢哋開心，因為大家拍劇知道過程係幾咁辛苦，拍一套劇個個都付出好多努力，今個頒獎禮推遲到一月，就係俾多啲唔同劇集參與，競爭又會大啲，所以就更加隨緣。」
最終決定權係公司
雖然無綫頒獎禮今次標榜全民投票，得到海量網民力撐的宣萱看得很通透，明白一加一不一定等於二的道理，「不嬲都知 TVB有佢自己嘅規矩，要衡量好多嘢，大家可以投票，睇吓民意大概係點，最終決定權始終都係公司。」宣萱是演得之人，不用多說，一個演了廿五年戲的人，有的除了是演技，還有儲落的劇迷，而喜歡宣萱的劇迷，年齡層很廣，老中青幼均有。離開無綫五年，回巢拍《不》劇，一個 Mall姐角色令她人氣爆燈，得到網民支持力推為今屆視后，她說：「對我嚟講係緊要啲嘅，攞個獎返嚟好緊要就係大家同唔同意，唔會個個都同意，大家都有自己嘅喜好，但只要大部分人都支持，我覺得對自己嚟講已經好開心，唔一定要攞住個獎先叫最開心。」如果要揀，究竟宣萱會揀選誰是今屆的視后呢？「你話機會大嘅，前輩級機會都好大，菊姐、司棋姐、鮑姐全部都機會大，如果睇番啲後生嘅，同我同劇嘅唐詩詠，我覺得佢做得幾好，真係好嘅。」
想給觀眾驚喜
一二年離開無綫，雙方一直保持聯絡，早幾年已試過搵宣萱回巢拍劇，卻因劇種沒有突破而婉拒，「以前有傾過搵我返去拍套警匪片，我自己唔係好想，如果我係一個觀眾，好耐無見佢，我希望有一啲驚喜。如果再出嚟又係做律師、醫生、警察，我覺得作為觀眾嚟講無驚喜，所以嗰時推咗。公司都有問過我想拍啲乜嘢，我亦都表達過想拍番部講女人嘅戲，但當時未有，我覺得隨緣啦，有嘅時候再傾。」結果等到去年才等到一部關於女人的《不》劇，「當然我亦要睇吓個班底，對我嚟講因為拍嘢過程好重要，係要開心，當時未有劇本，只係口講大概故事係點樣，聽埋對手，所有嘢都 OK嘅時候，我就決定去做。」
同古天樂同居
回巢原因就是這麼簡單，宣萱亦沒有想過《不》劇會如此受歡迎，「諗都無諗過，我拍每一套劇其實都唔會諗，以前可能都會諗吓呢套幾好睇喎，應該得喎，呢套個卡士好大，覺得一定得啦，咁多一線演員去參與同一部劇，點知出嚟嘅效果係相反，係大家大跌眼鏡，好失望，就係因為太多一線演員，將故事分薄咗，唔集中，又要安撫吓呢個，俾啲戲你做，俾啲戲佢做，成件事最後出嚟係好散亂。」很多人指 Mall姐一角，是宣萱事業上的另一個高峰，她笑說：「絕對係，無諗過會發生，你問我又唔覺自己以前有咩高峰，其實好好彩入咗行已經有機會拍劇，一拍已經係一線尾、二線頭，好快就做咗一線，一路都係平平穩穩，無乜特別彈出嚟，反而覺得二十五年裡面彈嘅係呢一下，突然之間有咗個代表作，有一套戲真係令觀眾一見到我喺街，到今日都係會叫我 Mall姐，作為演員覺得好滿足！」
好友古天樂為拓展娛樂事業版圖，投資開經理人公司，難道宣萱已簽約旗下？「我哋係 freelance合作形式，我哋唔簽字結婚嘅，我哋只係同居，試吓大家夾唔夾先，無謂一唔開心搞到好麻煩，又俾份合約綁住，因為以往經驗都係咁，經理人同藝人要夾嘅，就大家都雙贏，而家合作咗四個幾月所有嘢都好順利。」
自我調校出灰色地帶
宣萱的性格很鬼妹，說話直腸直肚，不會轉彎抹角，在娛樂圈生存有點困難，「會㗎，絕對係！」明知如此，卻沒有想過改變，她說：「會調校，但唔會扭到自己變咗另一個人。後生時就更加率直，我相信每一種性格會有佢嘅好同唔好，好嘅係我嘅直率帶俾我好多朋友，佢哋鍾意我坦白，唔會好圓滑咁講一啲氹人嘅說話，但唔好嘅就係，有啲人可能唔係咁鍾意聽啲太直接嘅說話，我自己都有諗過係咪應該要扭呢，但我又過唔到自己，呢個係我嘅性格，總之唔係做緊一啲傷害人嘅嘢，盡量 keep番自己，只不過有啲位以前就只可以黑、白，無灰色，係咪可以有番啲灰色地帶呢？可以調校番唔使太執着，或者用另一個方法去達到同一個效果。」
要睇得好清楚先開始
事業有成績，愛情運卻未到，這些年來，宣萱先後與張衞健、榮文瀚、牙醫陳建緯、獸醫 Ruan及意大利型男 Fran拍過拖，不過未能開花結果，四十七歲的她，對感情一樣很隨緣，「而家真係覺得要啱，要睇得好清楚嗰個人係啱我先至會去行嗰一步，我亦都唔會再嘥時間，人大咗會清晰咗自己想要咩，其實當有追求者埋嚟時，我好快已經知道呢個人啱定唔啱。」雖然年紀不小，但 keep得很好，又是另一個凍齡美人，一定很多追求者！她說：「唔係好多，少少啫，唔會無嘅。我同一個人一齊，希望我可以令佢開心之餘，佢都可以令我開心，唔係互相去管，要你去適應我，我唔俾你做呢啲嘢，因為我唔鍾意你做，希望搵到個人大家各方面都夾，所以就係價值觀問題，如果價值觀相同，兩個人行埋會少咗好多拗撬，因為大家睇嘅嘢會同一個方向。」會否因對方而離港，移民外地生活？她說：「如果將來遇到個人佢因為工作要走，我都大機會會走嘅，會嫁雞隨雞，呢方面比較傳統，去到呢一刻如果遇到個啱嘅人，我覺得有啲嘢要放棄。」
我的中學回憶錄
宣萱入行 25年，拍過多套劇集，演過無數角色，筆者的中學時代仍有追劇潮，當時，就是很喜歡宣萱主演的劇集，《阿 sir早晨》、《壹號皇庭 IV、 V》、《刑事偵緝檔案 IV》、《天地豪情》等，事隔多年，去年重拾追劇心態看《不懂撒嬌的女人》，加上今日與她做訪問，回憶湧上心頭，看來是時候煲煲她的舊作品，回味一下。
撰文：海 山
攝影：蕭敬漁
服裝提供： Brunello Cucinelli
場地提供： Hexa@ harbour city（六公館）
|
鍾意就快D Share啦！
|
|
|
