袁詠儀（靚靚）同張智霖（Chilam）結婚17年，只得張慕童（Morton）一個仔，但其實早幾年前，張氏夫婦曾經講過希望追多個女，不過咁多年都未見喜訊，問到靚靚會唔會考慮人工受孕等方法？靚靚帶笑說：「其實你秉講嘅我都試過晒，首先我中醫調理身體啦、又針灸呀、又瑜伽呀，到咗某個時候呢，我覺得可能要依賴一啲醫學上面嘅嘢，咁我就去‥‥‥當然去試就係可唔可以人工受孕啦。」
講到想生多一個小朋友嘅原因，靚靚話全因為魔童：「我生完個仔之後，個仔到咗六、七歲啦，我就全力咁去試去做，點解呢，因為我個仔，我發現佢得一個嘅時候佢又悶啦，同埋佢好自己呀，好多嘢嘅角度好自己，但係我想話俾佢聽個世界唔係得你自己，仲有好多人好多嘢，我好想佢懂得同人分享，所以我就好想去生多個。」
魔童雖然今年只得11歲，但靚靚話個仔有時傾啲好深嘅問題時，都表現得幾成熟，就好似佢同Chilam決定生多個之後，靚靚當年都有同魔童講呢個決定：「我話俾佢聽我想試下有無多個bb，我同佢討論，我話俾佢聽我做緊啲乜嘢，佢初初唔贊成㗎，但後尾唔知點解佢就好贊成。例如我要食一啲藥呀，或者我要做啲乜嘢，我都會同佢講，因為我想要多個bb，所以就要咁樣做囉！咁佢就會『哦！』咁樣。」
靚靚試咗幾次人工受孕之後，有一次以為好有機會成功懷孕，仲已經同魔童講咗呢個喜訊，點知最後‥‥‥「但係最後都冇緣份，我覺得我需要話俾我個仔聽，因為佢成個過程同我一齊去見證，我話俾佢聽『sorry呀！我真係對唔住，無辦法喇‥‥‥』我個仔即時爆喊呀！喊到呢！傷心到呢！好似搶走咗佢所有玩具咁！因為佢好想要個細佬或者細妹，所以佢諗諗下又喊，諗諗下又喊，我真係無諗過佢會咁，因為以前同佢講嘅時候，佢就係嗰啲話『如果有個妹妹就一定會要虐待佢，如果係細佬就唔會俾佢入房！』佢係講埋呢啲嘢㗎！所以我哋無諗過話俾佢聽真係無緣份嘅時候，我以為佢係嗰啲，哦ok is okay！嗰啲咁樣，我哋無諗過佢喊到咁！我覺得我個仔真係好善良，個人好感性呀！」
其實魔童見住媽咪又食藥又做試唔同方式時，佢覺得自己即將多個細佬或妹妹，佢仲已經諗埋叫咩名個添，直到最近靚靚同魔童講，佢同Chilam真係放棄咗再生多個時，魔童先至接受。
除咗因為知道冇細佬妹而爆喊之後，仲有一個人係可以令魔童放棄一切嘅，嗰個人就係靚靚個媽咪，因為靚靚同Chilam唔係香港嘅時間，魔童都係由婆婆照顧，所以魔童好黐婆婆，靚靚話：「佢好識得氹我媽咪，如果你話送走佢婆婆呢，佢咩都可以唔求你，但就淨係求你唔好送走婆婆！」
記者：陳月媚、倩宜
攝錄：馮峰、卓振輝、吉吉
攝影：林德雄
化妝：Kerry wong
髮型：Sam Pan @Muse Hair
場地提供：好酒好蔡
|
鍾意就快D Share啦！
|
|
|