民主派過往瘋狂拉布，但係修改咗《議事規則》之後，泛民就冇得郁。喺今日(8日)立法會大會審議政府多條法案，建制派就積極踴躍發言，令法案遲遲都未通過，民主派會議召集人莫乃光批評建制派故意拉布，令佢哋提出嘅傳召律政司司長鄭若驊議案未能喺今次大會討論同表決，仲話對建制派嘅做法感到遺憾。民主派嘅對白聽落熟口熟面，呢鋪真係風水輪流轉喇！結果建制派真係拖死咗議案，玩謝泛民。
鄭若驊一上任即爆出寓所僭建醜聞，莫乃光早前代表民主派動議傳召鄭若驊喺本月28日前到立法會交代，希望喺下月立法會補選前辯論，為民主派提供彈藥。由於28日係政府公布財政預算案嘅日子，立法會當日唔會召開大會，所以本周嘅大會係本月的唯一大會，如果今日大會討論唔到，動議就失效喇！
本周大會有3條政府法案，建制派由今日大會開始就法案積極發言，部分建制派如周浩鼎等更講完又講，搞到民主派心慌慌，驚排喺政府法案之後嘅鄭若驊議案趕唔切討論。民主派嘅朱凱廸今朝仲撤回佢提出嘅傳召運輸及房屋局局長陳帆到立法會就港珠澳大橋混凝土測試涉嫌造假事件交代嘅議案，以加快會議進度。
以前民主派拉布，建制派為免變「幫兇」，會上都有口難言，修改議規後終可暢所欲言。今日大會審議有關禁止便利店、網店等向未成年人士賣酒嘅法案時，公民黨郭家麒批評建制派「人權上身」，為咗利益唔反對政府，就畀建制派圍插。自由黨飲食界議員張宇人鬧爆郭「精神分裂」，話泛民成日講人權，但都支持過警方搜身，批評郭講嘢唔經大腦。而周浩鼎亦炮轟郭老屈，亂扣帽子，誤導市民。
當大家以為討論唔到鄭若驊議案，建制派突然加速，用咗約3小時就通過最後一條法案，開始辯論傳召鄭若驊議案。建制派「班長」廖長江否認拉布，因為即使今次大會未能討論傳召鄭若驊議案，民主派之後亦可以再提出。
另亦有建制派指，之前佢哋有人擔心鄭若驊僭建會影響選情，但參選立法會建築界補選嘅民主派候選人司馬文亦被揭發僭建，所以民主派如攻擊建制派撐鄭若驊，建制派亦可以民主派包庇司馬文反擊，故此係咪辯論有關議案都冇所謂。
好明顯喺修改議規後，過往拉布拉到橫行霸道嘅民主派已喪失主導權，最後建制派拖死咗鄭若驊嘅議案，冇得投票，今鋪真係輪到建制派玩謝民主派喇！另外，建築界補選另一候選人為謝偉銓。
|
鍾意就快D Share啦！
|
|
|