鏡頭前鄭中基勇救一躍而下的顏卓靈，鏡頭後亦「厚多士」協助對方上水面，令白只打爛醋埕。
探熱針
鄭中基多事英雄救美白只醋爆：你無義氣!
15年尾，顏卓靈同白只拍電影《大樂師•為愛配樂》感情一日千里，之後更大方認愛。查實兩人埋位拍《大》片期間，有個極唔醒水的大電燈膽鄭中基阻頭阻勢。試過兩人罕有同場拍落水戲，鄭中基竟然幫手將顏卓靈移離水面，令白只白白錯失救美加分的時機，難怪白只醋爆咆哮：「你無義氣！」
好心做壞事，鄭中基何必呢！
好心做壞事
《大樂師•為愛配樂》的主景——魚排在糧船灣海中心搭建，不計其他接駁交通工具，單是快艇前往魚排的船程，半小時走唔甩，但難得該區海水清澈，鄭中基不單只無嫌棄每天開工舟車勞頓，仲話：「頭先先見到成群魚游過，日日就係咁返工真係幾爽！」
戲內白只同鄭中基負責睇實肉參顏卓靈，所以絕大部分時間都是三人群戲，難得有場兩人跌落海的戲，雖則天各一方無親密接觸，但作為發展中的情侶絕對是互相加分的大好時機，偏偏鄭中基無感覺兩人眉來眼去，按劇本拍完跳海救顏卓靈後，順勢同工作人員協力扶對方上水，明顯唔熟水性，靠救生圈保命的白只，眼見英雄救美的加分機會俾拍檔搶走，醋埕上身，即指住對方咆哮：「你無義氣！」好心做壞事，鄭中基尷尬傻笑，但俾鹹水醃眼的顏卓靈就冧到暈。
明顯大細超
不論拍電視或電影新人總是難逃「新嚟新豬肉」被人恰的狀況，偏偏年紀最細、資歷最淺的顏卓靈備受劇組全面呵護，五花大綁無得郁的時候，劇務、茶水阿姐不時送水又噓寒問暖，到埋位拍落水戲的時候，遇上氣溫分外清涼，劇組又一早預備好暖包，上水、落水總有一大班幕後護駕，連當時未坐正做男友的白只眼紅到一個點。「我唔係好熟水性，落水拍戲，淨係得個水泡，佢哋（幕後）搞掂咗 Cherry（顏之洋名）先至理我㗎！」
有愛自然能夠戰勝大細超，白只又點會捨得嬲顏卓靈先！
撰文、攝影：娛樂組
來源 source: http://hk.next.nextmedia.com
|
鍾意就快D Share啦！
|
|
|
