鄧麗欣（Stephy）和方力申前年突爆分手，結束十年情，不過兩人再見亦是朋友。這對舊情人昨早在香港仔一同出席「揹水一戰」開步禮，小方突向近日人氣大旺的舊愛Stephy伸出友誼之手，她嚇儍定格一秒才回神握手，不過握手過後，Stephy依然顯得驚魂未定，場面尷尬。
鄧麗欣跟方力申早年合作愛情電影《獨家試愛》、《十分愛》和《我的最愛》等，戲假情真，兩人相戀十年，可惜「婚訊」變「分訊」，前年3月，兩人透過經理人公司發出分手聲明，再見亦是朋友。Stephy甩拖後事業高飛，憑電影《空手道》發圍，除奪得香港電影評論學會影后，前日又獲頒《蘋果動新聞》首屆「最港電影大獎」的「最港女演員」，下月更會角逐「第37屆香港電影金獎」的最佳女主角。
享二人世界
近日人氣大旺的Stephy，昨早與方力申、任賢齊、陳瀅、「美人魚」歐鎧淳及男友胡子彤等，到香港仔出席「揹水一戰」擔任起步禮嘉賓，眾人更身體力行揹着4.5公升水挑戰15公里。開步禮中，台上的小方突擊主動向神采飛揚的舊愛Stephy握手，Stephy冷不防小方伸出友誼之手，竟被嚇了一跳，場面尷尬，她思量了一秒才伸手過來，及後二人大方合照。此時，司儀伍家謙欲叫小齊上台，但小方卻示意小齊稍等一會，看來他很想跟舊愛Stephy再享「二人世界」。
小方與Stephy轉眼已分手近兩年，雖然屢傳復合，但卻是「流料」，Stephy近年瞓身為事業拼搏，講到小方主動握手時爆出尷尬，她事後接受訪問時說：「頭先驚一驚，我本身已經唔夠瞓，一擰轉頭就被咁大隻嘅人嚇一嚇，同埋本身rundown佢係未上台。」大會安排小方和Stephy分開接受訪問，小方說：「分開訪問好正常，𠵱家又唔係同公司，我都想一齊做訪問，我冇所謂。」至於二人合照？小方則說：「好，上年都有合照㗎！」
為港女爭光
Stephy憑《空手道》首封香港電影評論學會影后，前日再摘下《蘋果動新聞》主辦的第一屆「最港電影大獎」中最港女演員獎項，小方亦替她開心，小方笑言：「最『港女』吖嘛，當之無愧。」Stephy聽後也回應：「佢證實咗我係『港女』，其實我喺電影上做咗好多次，就算《空手道》都係港女角色，我覺得可以為『港女』爭光都係開心，港女嘅感覺畀大家係負面，我覺得唔係，𠵱家港女係好獨立，好叻女。」
此外，有報道指無綫有意再開拍《美女廚房》，當年鐵三角主持小方、鄭中基及梁漢文仍受網友支持，小方說：「網民實有唔同嘅反應，我都想做，以前我好悶，但做咗《美女廚房》之後，我冇咁拘謹，不過無綫冇搵我，已經係十年前嘅事，都唔同年代，可能佢哋有更啱嘅人選。」
採訪：黃曉研
攝影：仇志德
|
鍾意就快D Share啦！
|
|
|
