「第37屆香港電影金像獎頒獎典禮」今晚將於尖沙嘴文化中心舉行，頒獎禮喺八點零四分開始。一開始頒獎禮由動畫開始，由幾個小朋友旁白，以慈雲山有怪獸為主題，兩個小朋友扮演導演同演員，仲演出一個小劇場，之後個小朋友就變咗做阿Sa同張繼聰，佢哋以歌舞形式，講述兩位對電影充滿夢想嘅人，奮力創出自己天地，歐陽靖(MC Jin)亦rap住加入演出。
2346：金像獎最後一個獎項「最佳電影」，由《明月幾時有》奪得。六位名導演一齊頒發，包括許鞍華(Ann)、徐克、唐基明、余允抗、章國明同嚴浩，一班導演講笑話﹕「邊個都好，唔係Ann就得。」最後都係由許鞍華得獎。
《明月幾時有》共奪五個獎項，囊括三個大獎，包括「最佳電影」、「最佳導演」及「最佳女配角」，另外還有「最佳美術指導」及「最佳原創電影音樂」，成為今屆金像獎大贏家。
2334：印度男星阿米爾罕上台頒發最佳男主角，由《殺破狼‧貪狼》嘅古天樂奪得，古仔上台前先同成龍攬一攬，古仔喺台上：「我喺度諗香港人點樣做好香港電影。」
2318：林家棟同趙薇上台頒發最佳女主角。由《黃金花》嘅毛舜筠奪得，今次係佢首次得到呢個獎項。毛舜筠忍淚說：「好似發緊夢，感謝神！原來你嘅時間係今日。」又說：「我唔敢諗，因為覺無咩可能。我冇預備講咩，因為怕自己又再失望。」毛舜筠又感謝每一個投佢一票嘅人，包括好友黃愷欣、蔡少芬夫婦、商天娥、陳法蓉、嘟嘟姐等。又感謝雙親：「我知道爸爸喺天堂見我一定好開心。」佢又感謝兩個女，謂之前安慰自己，「最大嘅獎我已經得到喇！女，你哋坐喺邊？」最後多謝丈夫區丁平：「呢個一定要講，唔講我死梗！」謂感謝老公為《黃金花》做咗好多嘢，佢知區丁平仍未滿意，「老公，唔緊要，我攞咗（獎）喇！」
2311：劉德華同梁詠琪一齊上台頒發最佳導演，喺頒發之前，大會就播出咗五位候選導演嘅演出片段。由《明月幾時有》嘅導演許鞍華奪得，今次係許鞍華第六次得到呢個獎項。
2255：王菀之同盧冠廷繼續喺台上頒發最佳原創電影歌曲，由《大樂師‧為愛配樂》奪得，金培達喺台上多謝導演，佢讚導演係一個好有心嘅導演，因為導演用年去等待佢嘅作品。陳少琪問金培達嘅童年到底經歷過啲咩，點解可以寫到咁感動嘅歌出嚟，鄭中基就特別多謝囡囡，話係因為囡囡話鍾意聽佢唱歌，所以佢先唱返歌。
2248：王菀之同盧冠廷上台頒發最佳原創電影音樂，由《明月幾時有》嘅久石讓奪得，今次係佢第二次得到呢個獎，不過因為久石讓冇到現場，由嘉賓代領。
2240：郞月婷同薛凱琪一齊台頒發最佳兩岸華語電影，由《大佛普拉斯》奪得。
2224： 馮淬帆上台頒發終身成就獎畀楚原，楚原出場嘅時候，全場企起身拍手。
2218：由談善言同呂良偉上台頒發最佳女配角，由《明月幾時有》嘅葉德嫻奪得。佢已先後六次入圍金像獎「最佳女配角」，並是第三次奪得此項殊榮。一身紅噹噹嘅葉德嫻攞獎時表現淡定，佢話﹕「多謝許鞍華，于冬，台前幕後所有工作人員，尤其係幕後人員，喺適當時候，好似我戲內咁做好勇敢嘅事 仲有經理人。」
2208：黃秋生上台頒發最佳編劇，由《相愛相親》嘅張艾嘉、游曉穎奪得，游曉穎喺台上指今次美夢成真，又好多謝張艾嘉畀咗呢個機會佢，張艾嘉就話應該係畀游曉穎講晒所有感言，因為冇佢呢個故仔。
2203：Tony Jaa同盧惠光上台頒發最佳動作設計，由《殺破狼‧貪狼》嘅洪金寶奪得，今次係佢第四次得到最佳動作設計。佢喺台上話香港越嚟越少動作片，今次如果唔嚟的話，可能之後都冇得嚟，所以今晚佢一定要到。
2142：游學修同鄭中基上台頒發最佳男配角，由《拆彈專家》嘅姜皓文奪得。
2136：白只同羅家繼續留喺台上頒發最佳音響效果，由《殺破狼貪狼》嘅曾祥景同李耀強奪得，曾祥景係第八次奪得呢個獎，但因為上年過身，所以由女兒上台代領，李耀強今次係第三次奪得呢個獎。
2130：白只同羅家英上台頒發最佳視覺效果，由《悟空傳》嘅黃智亨、徐建奪得，佢哋喺台上多謝所有畀機會佢哋嘅人，仲強調視覺效果係電影語言嘅一部份，最重要係多謝導演郭子健。
2113：成龍上台頒發專業精神獎，成龍介紹得獎者楊容蓮Pauline，指佢係幕後中嘅幕後，更指大家都好需要佢，仲指自己知道Pauline拎專業精神獎，專登返香港頒呢個獎。Pauline一出場，全場九成人企起身拍掌！
2101：李燦琛、鄧麗欣上台頒發最佳美術指導，而呢個獎由《明月幾時有》嘅文念中、利國林奪得。
2055：徐錦江、顏卓靈上台頒發最佳服裝造型設計，由《西遊伏妖篇》嘅余家安、利碧君奪得，不過兩個得獎者冇到現場，由兩位嘉賓代領。
2054：頒發今晚嘅最佳衣著獎，由鄧麗欣同姜晧文兩個奪得。
2039：古天樂同胡子彤出場頒發新晉導演，胡子彤仲拎出太陽眼鏡扮古天樂跳《今期流行》，新晉導演由彭秀慧奪得。
2027：蘇麗珊、余香凝、廖子妤上台頒發最佳攝影同最佳剪接獎項。最佳攝影由《追龍》嘅關智耀奪得，而最佳剪接就由《追龍》嘅李嘉榮奪得。
2017：開始頒發第一個獎項，就係最佳新演員，由一班古惑佬，鄭伊健、錢嘉樂、陳小春、謝天華、林曉峰做頒獎嘉賓，佢哋仲講返自己第一次做演員嘅電影。最佳新演員由《黃金花》嘅凌文龍奪得！
|
鍾意就快D Share啦！
|
|
|
