唐文龍入行22年，早前終於憑《溏心風暴3》一嚐爆紅滋味，佢日前接受《蘋果》專訪時，好感慨咁話：「唔敢講話吐氣揚眉，但呢三、四個月嘅訪問，真係多過我呢一生喺娛樂圈做嘅訪問，斷斷續續連埋電話、電台，五、六十個都唔止。我唔想假裝謙卑，我反而想講，我哋做演員，今日唔知聽日咩事，聽日唔知後日咩事，今日嚟講有人在乎，我好高興，只能享受今日嘅在乎，用呢種力量去面對明天。」
講出咁語重深詳嘅說話，因為唐文龍真係捱過。雖然小學已舉家移民美國，但唐文龍坦言家庭環境並唔理想，佢解釋：「當然，父母喺香港係白領，但去到嗰邊冇身份生活咁多年都唔容易，我哋只係開漢堡包店，乜都打回原形靠積蓄。記得有段時間，媽咪剪supermarket嘅coupon，有乜減價就食乜，細個有埋怨，唔明白點解又係食嗰啲，現在大個懂事，就知生活唔容易，何況媽咪聽到咁講，點諗呢？！」
唐文龍因為喜歡唱歌，早前喺無綫節目《流行經典50年》，唱番當年佢喺台灣發行首張唱片入面水蛇春咁長、17個字嘅歌曲《我要怎麼知道你愛我如果我們永遠不說》，發現原來唐文龍都係幾唱得。唐文龍當年唔理家人反對做歌手，但搵朝唔得晚，去到台灣發展都要兼職幫人畫時裝計設圖，佢話：「五百、三百一張，幫啲廠家畫，我仲要諗埋設計。」
之後回流返香港，拍過電影，輾轉喺99年加入無綫，就喺呢段時間住過劏房，又趁樓市低買樓。佢笑笑口話：「都係有穩定收入嘅，只係非常唔理想......開頭大約每月搵五位數一半啦(即五千蚊)，但唔好講得過份淒厲，因為大把人都冇。之後有段時間雙生雙旦，三生三旦，收入好啲，只係最尾兩年，自己擺位冇想像中咁，就硬著頭皮出去闖。」
問到大陸係咪真係咁好搵？佢苦笑話：「大家有錯覺，好似呢個世界去到大陸有金執咁，冇呢回事，佢哋環境大1000倍，但同樣競爭都大我哋100倍。每位香港演員行出嚟冇個失禮，但人哋講嘅係母語，普通話，我即使學埋併音，但都唔代表佢會你....咁快融合到入面，都係要講邊個運氣好。」
場地提供：FFG武術健身中心
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|