阿軒十七歲打工，將大公司的廣告四處貼，廿二歲老闆便安排他管理，廿六歲自立門戶，今天成為車房的老闆。阿軒說有今天的成績，最重要是不怕蝕底，一點一滴累積，「我個陣黐完自己個份，會去幫其他師傅手，老闆覺得依個小朋友唔怕蝕底喎，就俾多啲嘢我做。我要落場做嘢，另外幫佢安排現場點setup、幫佢計出糧、call人返工，可能打足五十個電話，先搵到十個人做嘢，出同一份糧。」
當年他願意捱義氣、搏到盡，他解釋因為自覺比人差，故力求上進，「因為本身學歷低，同人哋無得競爭，想去平衡返無咗學歷。」努力工作後，換來升職「加辛」，要每日放工後付出額外時間處理公司事務，他卻沒有抱怨，「我覺得你要學嘢嘅時候，首先要肯蝕底去做出一啲嘢，令到人哋去欣賞你，人哋先至會有心機去教你，而唔淨係同師傅講，你教我啦，有好多未必會肯，更加上佢教完你，你有機會走。」
加辛不加薪，所得的是更寶貴的人脈關係，「佢介紹咗好多大陸嘅廠家俾我去認識，譬如木器廠、鐵器廠、不銹鋼廠同埋纖維廠、膠片廠，接觸到幫我哋生產所有硬件製作。至於硬件落到嚟香港，因為我負責聯絡，所以我自己建立咗一個班底，於是就可以自己接生意做。」自立門戶收入增加，他才能有積蓄，加上找到合適的拍檔，終於實現自己開車房的理想。
撰文：財經組
攝錄：財經組
相關連結：
【電單車鍍膜】汽車美容貼出新意 價錢六千元起跳
https://bit.ly/2r9Pmv7
來源 source: http://nextplus.nextmedia.com
|
鍾意就快D Share啦！
|
|
|