游蕙禎早幾日換咗頭像，身穿唐服嘅佢有一種古典美。(游蕙禎fb)
青年新政游蕙禎失去立法會議員資格後，佢嘅動向仍受到各界關注，包括早前盛傳佢有新男友都成為城中熱話。今日(6日)適逢係游蕙禎27歲生日，不過就未見佢喺Facebook放閃，反而見到佢早幾日換咗頭像，身穿唐服嘅佢有一種古典美，但就疑似引發網民罵戰，有人留言指斥「支那禎」唔認自己係中國人，但又走去着唐裝喎！
一位名叫「袁健恩」嘅男子留言連番用簡體字去「鬧」游蕙禎，另有網民就指斥袁健恩千祈唔好着西裝，唔係就會變「西人」。雙方不斷以「Hashtag」留言互罵，游蕙禎更自嘲唔識文化唔好着。最後連九龍城區議員鄺葆賢都留言出聲，話袁健恩：「連做五毛都Fail(失敗)。」
不過，呢位袁健恩其實同游蕙禎都算老友，之前立法會九西補選，就一度傳出袁係游嘅Plan B，只係最後無出選。眼見罵戰好似愈鬧愈認真，袁健恩都急補鑊喺留言貼番張佢同游蕙禎嘅合照，證明輯相就係出自佢手筆，「鬧」完一輪原來都只係一場鬧劇。
來源 source: http://hk.on.cc
|
鍾意就快D Share啦！
|
|
|