【Happy Father's Day】黃翊近年復出幕前，太太陳存正患上腎病，丈夫不離不棄照顧有加，他現時身兼藝人、餐廳老闆、父兼母職在身，兒子Wesley（黃睿）轉眼已經12歲。今日父親節，Wesley日前跟爸爸落舖到大埔三小姐小菜學師，在父親指導下學執枱、擺枱、傳菜及落單等基本工夫，做起來有板有眼。
自少就在國際學校上堂，一口流利英語的Wesley在大牌檔幫手毫不忸怩，捧杯、放碟、斟茶遞水全無難度，黃翊教囝囝擺好枱後要禮貌地跟食客說：「各位請慢慢享用，畀多啲貼士。」Wesley本身既好動又愛畫畫，跟父親黃翊相處溫馨，當跟爸爸落單時，又鬼馬地以畫公仔取代菜式名，更即場畫了隻小貓咪送給爸爸，兒子表現滿意，黃翊很冧地說：「叫做合格好期待今年阿仔同媽媽嘅手作禮物，希望有驚喜。」
難忘收心意卡
提到父親節，黃翊自言是飲食業頗旺的一天，所以沒有休息，他說：「做大牌檔要開工，我哋冇乜父親、母親節，平時一家人一齊食飯已經好開心。當然仔都12歲，都會諗唔使提佢，佢會整份禮物畀媽咪、爹哋。」Wesley神秘地說：「唔可以透露整乜嘢禮物，當日先知。」黃翊最難忘收過囝囝在卡上寫上「No.1 Dad」，令他好窩心，期望今年會有驚喜。
唔迫同台演出
黃翊和太太當初送囝囝到國際學校目的，是擴闊兒子視野，讓他自由發展，同時亦要着重傳統禮貌，他笑言接受不到囝囝放學回家跟自己「hi」，他說：「我唔係咁鍾意，同佢講應該係：『hi爹哋』有一個稱呼，呢樣想佢改善。」音樂方面兒子遺傳了父母的音樂細胞，學吹色士風已有一段時間，在音準及拍子上都處理得好好，唱功亦不俗，黃翊說：「絕對唔會強迫囝囝做任何事，即使自己十月有演唱會，都不會強迫父子同台演出，除非佢真係想啦。」
黃翊太太陳存正近年患上腎病，黃翊要兼負母職，搵食之餘也要照顧家庭及太太，雖然有一定壓力，但勝在樂觀面對：「太太身體唔好有一段時間，都習慣咗，有腎病洗腎，目前穩定咗精神咗，覆診指數都好咗。我哋比較樂觀，大家一家人去面對，樂觀對病情都好。」黃翊指囝囝在這段時間好生性，不會激嬲媽咪，懂得照顧自己。而他每日只見到阿仔一面攬一下，父子相對時間不算多，所以珍惜相處時光。
採訪：卓寶花
攝影：林德雄
|
鍾意就快D Share啦！
|
|
|
