前晚係張敬軒紅館個唱第二場，一如首場，降兩度打頭陣先。唱完歌，降兩度就話：「噚（前）晚嗰個張敬軒以為自己好巴閉，請個嘉賓！既然噚（前）晚佢有嘉賓，我今（噚）晚都要有。不過，呢位嘉賓來頭唔細，大家唔知我投身音樂界之前，係投身電視界嘅。我喺電視界做到差唔多『嶄露頭角』（係咪用錯字眼？），本身接到個好劇集，點知開波前兩日，先知俾人搶咗個角色，仲要套戲依家上緊！我今（噚）晚就要公審佢，問點解佢要搶我角色！」講到好有火咁喎：「有請我哋嘅視后，胡定欣！」
皇后兼視后胡定欣就喺歡呼聲下出場（散花），降兩度就話「我覺得你今（噚）日好靚！平日電視睇你着咁多布，今（噚）晚做咩着咁少呀？今(噚)晚見你着古裝，差啲認你唔到呀……高低眉！」
胡定欣就話「搶你風頭嘛！我夠係平日見你着開西裝，今（噚）晚見你着番女裝，我都爭啲想……嘔呀……」
降兩度之後變番張敬軒角色——好正經咁同大家介紹番，其實佢同胡定欣已經識咗十幾年，對方仲幫過佢首《餘震》MV做過女主角。
軒仔仲即場播出打電話邀請胡定欣做嘉賓嘅電話對話內容，對話中軒仔都係嗰啲啦，好想邀請你做嘉賓啦，咁，電話那頭嘅胡定欣就好似中頭獎咁大嗌：「哎吔！我好開心呀！我好緊張呀！我今朝先瞓呀！我好想快啲天光呀！可以快啲去解決，我係咪好低能呀？」原來胡定欣開心得滯，成晚都唔瞓，等天光可以即刻打俾監制，為做軒仔嘉賓請假。
軒仔來本諗住交個台俾胡定欣唱歌，但升降台遲遲未降下，胡定欣即時「上身」：「睇路呀...妹妹！深宮條路唔係你想像中咁易行0架，最緊要係《無悔無愧》！」啱喇，跟住胡定欣就係唱《無悔無愧》喇。
|
鍾意就快D Share啦！
|
|
|
