藝人王敏德（Michael）與馬詩慧（Janet）的三個仔女王曼喜、王麗嘉及王躍穎藉着父親節表心意，三人合力下廚炮製美食孝敬父親。他們烹飪王敏德最喜歡的帶子三文魚扒，首次品賞子女廚藝的Michael大為感動，他說：「第一次食佢哋煮嘅嘢，好鍾意，好感動，希望繼續會咁做。」在旁的Janet潑冷水，笑指：「相信都好難。」
發脾氣好惡
平時見Michael與仔女打成一片，而Janet則看似比較嚴肅，但原來Michael才是嚴父，教導子女時十分激進，發火時冇情講，凡事亦不會講多過三次，不聽教寧願一拍兩散！問到三個小朋友邊個最難教？Michael保守地說：「都好窩心。（邊個最乖？）差唔多，佢哋好平均。」Janet隨即笑說：「都係好難湊。」Michael接着說：「佢啲有小小曳，但一講唔好就即刻唔會做。」Janet答嘴：「你講佢哋就聽，我講好多次，但佢哋都可能繼續做。」Michael回應：「咁你要講大聲啲，講到好大聲，你唔夠大聲。」問到Michael是否惡啲？Janet即贊成指他惡起上嚟可以好惡，Michael解釋：「其實我唔會惡，但如果佢哋錯我先會大聲、會惡，一兩次已經夠晒，佢哋睇到我最唔開心嘅樣，佢哋唔會再做。」Janet隨即舉了個例子：「我記得佢哋細個時，當時好興睇細部嘅DVD，咁佢哋爭睇又推嚟推去，好嘈，跟住Michael好大聲去叫佢哋stop，佢哋第一次冇聽佢講嘢，第二次又唔聽佢講，第三次佢行埋去，攞起部DVD一手掟埋去牆度，爛咗，三個仔女呆咗望住佢，跟住就開始喊。自此之後，佢哋知道爹哋可以去到幾盡。但我就唔會亂掟嘢，我理智啲，知掟爛咗要用錢買，個分別就喺度，佢惡起上啲可以一拍兩散，呢招佢哋受教，但唔會做得多，做得多就冇用。」
指示老婆教仔女
Michael雖為嚴父，但亦有冧招氹子女，Janet說：「佢另一方面都好寵啲小朋友，佢哋要咩就畀咩，有時佢哋唔使講話要，都已經畀咗先。」教導子女，Michael不需要樣樣親自出手，精明地假手於人，Janet説：「有時應該要講佢哋時，佢又唔講，要指示人哋去講。（指示你做？）係，（你又聽話講？）咁冇辦法，佢唔講，始終都要有個人講，係咪都要做，咁咪我去做。」
場地：Tas’Mania limited
|
鍾意就快D Share啦！
|
|
|
