黎俊彥，一個陌生嘅名字，佢兩次出道，第一次喺13年以「葉寶安」出現，當時佢係286磅肥仔一名，到今日再登場已變咗160磅，十足《瘦身男女》真人版。佢早前同可嵐合唱咗首講癌病嘅歌《心聲回應》，問佢減肥原因，黎俊彥話：「16年時身體開始有問題，血壓高、成日頭暈，有時突然喺街暈，自己好驚㗎，唔知點算，甚至嚴重到瞓覺突然彈起身唞唔到氣，發現我有睡眠窒息症，開始真係要減。」之後跟足營養師多菜少肉、少鹽少糖少油，謝絕韓燒、打邊爐，仲擔心會冇朋友，好彩老友支持。飲食改變，生活習慣亦由以前冇3、4點先瞓，𠵱家12點就瞓，唔使一年已經減到160磅。
減肥要有目標
黎俊彥話減肥過程辛苦，但見到成效，一切都值得：「輕盈咗，嗰時行街，一陣腰攰，膝頭會痛，𠵱家呢啲係完全唔存在。做番gym操肌肉頂吓個丹田，着衫會靚啲。」黎俊彥話秘訣係要先確立目標，唔係一切都只係口號：「講咗好多次減肥，但係冇目標，今次係健康同音樂夢，係一個好大嘅人生目標，所以就做好佢。」佢話當意志變成習慣，減肥成功就已經指日可待。
撰文：馮仁昭
場地提供：FAC Sportagon
服裝提供：Dusty
|
鍾意就快D Share啦！
|
|
|
