當年……真係好多好多年前，近廿年，爾冬陞（小寶）一次受訪，大爆兄長秦沛的秘密。小寶笑言，嗰陣大哥好多女朋友，有時帶女友外出用膳，都會帶挈埋佢呢個細佬「有餐好嘅食」。
今日再問Paul哥，後生嗰陣係咪好多女人？他說：「女人，我都同人講，拍拖嗰啲，拖手仔個心已經跳到呢度（指著胸口位置），真係㗎，好多個到依家都好好朋友，如果有其他啲嘢呢，唔可能到今時今日都咁好朋友，真係，能夠錫到面珠仔已經不得了。」
但小寶爆你好多女朋友喎？Paul哥淡定接招：「唔係男朋友就女朋友同依家唔一樣，真係好純，跳舞隔開三呎，冇話攬住，嗰啲係修哥胡楓年代，去舞廳，我一次都冇去，我係『A GO GO』年代。」
咁幾多歲初戀？Paul哥笑言：「好晏，19歲，唔係呢行，好多年之後先見番，大家好客氣。所謂初戀，瞓覺瞓唔着掛住佢。嗰時唔興講電話，都係寫信，寫到佢走咗去關島，無疾而終。」至於翁倩玉曾說Paul哥是她的初戀情人，對此Paul哥說：「有人講過，佢自己都承認，翁倩玉初戀男友係秦沛，佢依家係我仔女嘅契媽，拖手仔拍拖之嘛，好開心，跟住佢去咗日本，書信來往。」
Paul哥曾離婚，與梁盛子一段婚姻，誕下姜文杰姜麗文兩兄妹。後來兩人離異，有傳Paul哥將大部份資產都送給前妻，條件是要一對仔女的撫養權。所以，曾經有一段時間，Paul哥頗有經濟壓力。
一個大男人，拖著兩個小朋友，當時的Paul哥出名是「帶子洪郎」。現任妻子森下繪梨的出現，改寫了Paul哥一生。Paul哥說，影響他最深的女人，也是她。
「我依家個老婆。係啦，將我兩個仔女教到大學畢業，佢照顧得好好，我先可以安心喺香港一個人。佢好叻，處理我啲臭脾氣，話我聽應該點處理。」
「佢細我七歲，但成熟過我好多，教我投資。唔單止對我，對我仔女都係，我仔女聽佢錫佢多過我，我阿媽、所有親友個個知。」問Paul哥有甚麼話想向太太說？「叫佢健康囉，睇住我呀！」眾笑。
Paul哥續說：「佢身體OK嘅，依家喺加拿大。呢幾年我喺邊佢喺邊，陪住我。」說到此不無感謂：「佢辛苦啲囉。以前我做『太空人』，飛來飛去，依家佢好enjoy飛嚟飛去，因為喺大陸拍戲，呢十幾年去過唔同地方，佢陪住我到處睇。」原來Paul嫂厲害如人肉GPS：「佢好叻嘅，真係叻得好犀利。以前我好擔心佢，佢話得㗎，攞巴士地圖、地鐵地圖，自己到處行，佢又好行得，行幾粒鐘都得，咁咪放心囉。坐巴士去杭州西湖，影埋相；去上海又好犀利，坐9號線去到徐家匯，佢全部都知。」
「佢斗零都放棄晒，嫁畀個窮小子，我嗰時冇乜錢。我都好慘㗎，訂婚戒指都唔夠錢買，要問佢借，不過我還番畀佢。都好多錢㗎，問佢借咗十幾萬，幾大粒㗎嘛，所以咪還囉，拍一部戲咪還啲，還晒㗎喇。
「唔係窮，冇乜錢囉，總之我畀唔到佢屋企畀佢個啲，『你考慮清楚，不過，我會盡我力量，總之有飯食飯，有粥食粥，我會努力嘅。』」咁當年究竟點追到千金小姐？他笑：「鍾意我有乜辦法？真係，緣份囉，所以男男女女我都係講嗰樣，唔好強求，分開咗唔好難過，可能係你運氣呢！如果結咗婚，生幾件，出現問題，怨都冇得怨。所以唔緊要，係佢就係，唔係佢點都唔係佢，take it easy。」
總結：
【Take it easy】
入行70年，Paul哥回望大半生，遺憾有二。
「第一，睇唔到我自己爸爸。六歲，仲有少少記憶，唔係好清楚；第二，我做爸爸睇唔到仔女真真正正同自己成長，除此之外，OK啦，啱㗎啦，每人背後孭咗本書，寫好晒，放心啦，係你就係你，take it easy，到我呢個年紀，起身又賺咗一日，開開心心囉，今日都係賺番嚟嘅。」
採訪：余燕儀
攝影：林德雄
攝錄：廖達燊
場地：DADA Bar + Lounge @THE LUXE MANOR
|
鍾意就快D Share啦！
|
|
|
