吳博君，一個陌生的名字。維基沒有關於他的條目，但見到他的樣子，會記得，曾在多部無綫劇出現。
吳博君常被派演小人物、鹹濕佬、店小二，甚至壞人。97年金融風暴，一個大浪，這個小人物就給無綫裁走。當年他40歲。
40歲才「被轉工」，由頭做起，吳博君轉行做過麵包師傅、紙紥舖、寫字樓清潔……由於不是做主角的命，銷聲匿跡娛樂圈多年後，沒有人會想起他。
人生如戲，台上台下都是小人物的吳博君，61歲，還未拿到兩蚊乘車優惠，卻命途多舛。今年3月16日，他忽然四肢無力，癱瘓在床，嚇得太太慌打999報警，急送入院，結果證實患了罕有的運動神經細胞疾病（MND）——俗稱「漸凍人」。西醫說：「冇藥醫。」吳博君跌落絕望深淵，見着手腳肌肉不停流失，瘦到皮包骨，太太停工照顧，兩人經濟陷困境。大小便都要在床，四肢動彈不得，頭腦卻是清醒到不得了。
吳博君曾經想過，不如死了更好！
幸而，天無絕人之路，在太太悉心照顧、親友打氣，還有患者的努力下，吳博君現在竟然奇蹟地可以再站起來，靠腳架走路。沒想到，拿起筷子自己進食，感覺原來是這樣美好。
這天，他在荔景屋邨家裏接受《蘋果》專訪，含淚細訴由地獄折返人間的心路歷程。
記：記者 吳：吳博君
記：你患嘅係乜嘢病？
吳：我呢個病其實好罕有，佢個名叫做運動神經細胞基因變異（MND），我聽都未聽過，直頭唔知係乜嘢一回事。開頭有少少手震，以為柏金遜，咁就去睇門診，安排我入去睇專科，後來手同腳越嚟越冇力，冇力到瞓喺張床起唔到身，成個好似癱咗咁，冇辦法，叫白車入醫院。
醫生都check咗成個禮拜，心臟、肝臟、腎臟，又驗好多樣嘢，之後才知道係呢個病。醫生同我講：「你第日會冇力！目前嚟講全世界冇藥醫，慢慢差落去！」
記：病情最嚴重情況係點呢？
吳：完全癱喺張床唔郁得，大小便都要喺張床，四肢完全郁唔到，頭腦仲好清醒，咁先至痛苦！醫生同我講咁情況嘅時候，我成個人沉咗落去，好down、好down，跌咗落去絕望裏面，完全冇晒希望，直情等死咁樣，係好灰好灰！太太都好傷心，冇晒心機，大家好似等死咁！
記：喺病床覺得完全冇人幫到你？
吳：醫生都講到完全冇辦法，你仲可以點？變咗完全冇希望。我曾經諗過，不如死咗去好過，如果一個人去到咁嘅地步，手腳肌肉係咁流失，瘦到好似皮包骨，自己睇到都好絕望。
我喺醫院住咗個幾月，冇辦法，醫生判咗冇得醫，叫我嚟緊日子去安老院，之後出咗院就去安老院，住咗差唔多成個月，每月費用要$12,000，朝朝聽隔鄰床嘅老人家嗌交，負能量好大！
記：西醫有冇話點解你有呢個病？
吳：冇得講，完全唔知乜嘢一回事，細胞裏面基因變異咁上下，最近喺醫院聽到姑娘對話，近年發覺呢類情況多咗，佢哋話可能會唔會同依家啲食物有關？依家食物加好多乜嘢，變咗影響到人，我平時飲食好正常，又冇揀飲擇食，添加劑嗰類可能有影響。
記：點解依家行得番呢？
吳：喺安老院其間，艾威太太介紹我食中藥，好奇怪，兩劑左右，發覺有啲轉機，可以落到地行，行吓行吓越行越好，依家叫做行到下，即係有個進展，今日都有返醫院做物理治療，至於將來會唔會好番晒，大家都唔知，但依家好似有番希望，要同佢博過，或者打贏佢。
記：依家手手腳腳情況點呢？
吳（開心地笑）：有少少力，勉強可以揸筷子食飯，大小便、沖涼都仲得，但喺醫院真係一啲都唔得，由醫院到依家再行得番，都係呢一頭半個月事，希望越嚟越好，之前係冇希望，依家有希望，可以落街慢慢行吓。
記：患呢個病最大體會係乜？
吳（嘆氣）：無常！今日唔知聽日點，我由好開心，忽然間得到咁嘅病，由唔好心態變番好嘅心態，覺得好奇怪。以前唔係咁多病痛，只係膝頭退化做過手術，呢個病畀我感覺好突然，聽都未聽過。
記：有乜寄語畀同病相憐嘅病人？
吳：如果發現呢類病，早啲去醫，唔好咁易放棄，唔好絕望，各方面都試下，盡快醫，同時間競賽，同佢拼過，我依家每日做健身，強化番自己身體，睇下打唔打得贏佢。
採訪：余燕儀
攝影：林德雄
攝錄：沈健程
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|