在日本，年過35歲，因為駐顏有術，不被看出真實年齡的，都被稱為「美魔女」。不過，香港人要求高，能被稱作「美魔女」，年齡被推高至近50歲。縱使「門檻」高，娛樂圈中仍有不少女星達標，52歲陳雅倫（Ellen）是其中一人。
Ellen近年主力在大陸發展，除了拍廣告，又有自己公司。雖然只偶爾在港現身，但依然新聞多多，緋聞更加是停不了，以為崔建邦最新鮮滾熱鬧？又忽然傳與沈香大王簡文樂女兒Katie過從甚密，惹來「轉性」疑雲。
日前Ellen接受《蘋果》專訪，盡數多年來跟她「有關係」的男人，承認當中有真亦有假，又爆當年不知追求她的周焯華（洗米華）已婚，難得Ellen天生樂觀，屢敗屢戰，坦言至今仍然相信愛情，每次拍拖都視對方為結婚對象。
記：記者 陳：陳雅倫
記：經歷的愛情中，大多都由你提出分手？
陳：都係，發覺對方唔忠心，唔誠實，無安全感，影響我情緒，我就會走。使乜咁辛苦？不過大部份都可以做番朋友！
記：仲記唔記得初戀男友係點？
陳：初戀男友係醫生，o依家都仲有聯絡，18、19歲時去Ball識，嗰時佢已經讀醫，係好浪漫，拍拖都係喺HKU拖手仔！對方仲未結婚，不過順其自然，因為大家都變咗，而且無嘢咁完美嘅，拍戲咩！
記：過去拍拖都有選擇年齡比自己少，擇偶條件是甚麼？
陳：我好愛情主義，拍拖一定要鍾意嗰個人，唔會因為佢係大導演就鍾意，可能我係水秤座關係，我覺自己好易追，成日被媽咪話我係「單料銅煲易熟」！
記：多年來緋聞不絕，因為形象、外表較野性，予人隨便感覺？
陳：我認我都有呢一面㗎！我可以好靜，又可以好豪放，呢個性格喺我演藝生涯培育出嚟！
記：同陳庭威一段情是難忘嗎？
陳：我哋未入行就識，嗰時我仲讀緊書，有次去拍廣告遇到佢，我哋唔係拍同一個廣告，只係喺嗰度遇到，仲記得個畫面，佢抬頭望緊個rundown，神態好吸引，斷斷續續拍拖5年，最後俾記者發現。（記：傳聞分手，因為陳庭威被電視台禁拍拖？）分開因為大家性格唔夾，唔係因為公司嘅問題，不過華星嗰時捧緊我，李進係我經理人，公司一定唔想我拍拖，但我嗰時成日同記者講想25歲結婚，好搞笑！
記：目前已婚嘅黃尚偉，係你公開戀情中其中一人，亦係拍得最耐拖一個，有想過結婚嗎？
陳：我哋拍咗拖11年，係蘇永康介紹我哋識，拍拖日子其實係開心，嗰時自己係最忙最多戲，見面少，我哋每次見面都好珍惜，佢對我好好，每次出埠拍戲酒店都會有花。不過，最後係我提出分手。（記：為何要分手？）因為11年都冇結果……因為佢嘅屋企人話唔鍾意佢同娛樂圈人拍拖，但其實佢都係半個娛樂圈人，郭錦恩又係佢表妹，唔明點解會唔鍾意。嗰時有覺得唔公平㗎，因為唔係全部娛樂圈個個女仔都貪慕虛榮，我一直都自食其力。雖然分手嗰時佢有話同我結婚，但我覺得拖得太耐，都淡咗，變咗親人。
記：05年被影到和吳鎮宇在夜店舉止親暱和激吻，事後你們都說是相片角度問題，跟鎮宇關係如何？
陳：呢個係冤枉，真係唔係，大家識咗好耐，喺TVB拍劇，個個以為係，但真係最唔係一個，真係要澄清一下！嗰日俾人影，地方好嘈，傾偈埋咗，佢拍下我就俾記者影咗！好似崔建邦咁，佢嚟我生日party，都唔係惟一同我頭貼頭影相，只係有啲媒體無嘢寫就搵來寫！
記：09年洗米華（周焯華）追求你？你知他已婚？
陳：呢個（周焯華）我可以用曇花一現嚟形容……鬼知佢有老婆咩，喺澳門卡拉OK場合見到，大家有中間朋友識得。（記：點樣追你？）唔記得，太耐，因為好短時間唔記得。（記：幾時知佢結咗婚？）有次傾開偈，佢話佢結咗婚，我嘅反應係「吓！你……結……咗……婚……？我以為唔係……你無講……」我就直頭就係咁嘅反應，咁梗係走啦，因為唔可以做小三，而且我佔有慾好強，唔可以同人分享，會大吵大鬧，唔可以！
記：威尼斯人賭場總裁Mark Brown是你的最愛？
陳：佢好浪漫，外國人浪漫啲，又靚仔，大家好愛對方，佢又好鍾意我，人前人後都帶我出去。（記：分手原因？）我大脾氣囉！懷疑佢有第二個。（唔敢再搵靚仔？）靚仔係無安全感，但相信有例外，或者啲人覺得靚女無安全感，等於人哋睇我一樣！
記：同黃秋生緋聞又係真定假？
陳：呢個都係好搞笑。有次拍杜琪峯嘅戲，鎮宇（吳鎮宇）成日話秋生來咗，我都覺得奇怪，做乜成日講秋生？後來鎮宇爆，話以前秋生將佢嘅海報貼喺衣櫃門，之後我留意到秋生見到自己，又真係好怕醜，好似見到偶像咁，不過後來因為合作，大家都變咗好朋友！
記：前年公開和吳彥祖表哥Martin一段情後又閃電分手，更公開鬧爆對方，如何形容這段情？
陳：其實啱開始都有sence都啲嘢，但嗰時愛無咁警惕！有冇睇《志明與春嬌》？入面有句對白「人生總會遇到幾個人渣」覺得好啱，好有共鳴！
記：很多已婚男仕追求你嗎？
陳：大把，好多身邊女朋友嘅老公都有，但一定無可能，唔會做啲對唔住女朋友講嘅嘢，所以自己好多女朋友。不過，以前因為唔識圓滑，得罪好多人搞到無工開，依家梗係知道推人都有好多方法，唔駛咁直接
採訪：小米
攝錄：廖達燊
攝影：林德雄
場地提供：Indonesian Restaurant 1968
| 陳雅倫講到自己嘅初戀係醫生 | | |
| | | |
|
鍾意就快D Share啦！
|
|
|
