世界盃法國對克羅地亞冠軍賽前晚舉行，樂壇校長譚詠麟（阿倫）親自出征到俄羅斯為ViuTV作客席評述，結果收視報捷，吸引約174萬觀眾收看，同時全城網民洗版式狂Loop其講波金句，有讚有彈，封他為新一代金句王！面對正反兩極反應，真金不怕洪爐火，他直言：「我講任何一樣嘢都中晒。」
擔任客席評述的阿倫助陣ViuTV，前晚直擊全球注目的世界盃決賽法國大戰克羅地亞。ViuTV昨日公布世界盃賽事收視，指免費電視平台累積觀眾人數超過400萬，前晚決賽最高收視更達26.6點（約174萬人次），平均收視有24.4點（約160萬人次）。
傑斯背後「加持」
遠赴俄羅斯的阿倫與「招積」曾偉忠實地評述，未有怯場的他，可能因有偶像曼聯名宿傑斯在背後「加持」及直豎拇指下，他頻頻爆出金句。在他「助攻」下不但收視報捷，同時更引起全城網民熱議，指他以業餘水準來說已算不錯外，更輯錄其評波「金句」，封他為新一代金句王，指他可向黎明挑機。有讚當然有彈，亦有人批評他講廢話！
昨日社交網瘋傳阿倫的金句包括「球員打呢啲大賽真係要好冷靜」、「禁區左上角啲草短啲，球員好容易跣低」等，有網民為他平反，指足球評述員「桂神」黃興桂的廢話更多，列舉其三大講波經典廢話「十二碼一係入，一係唔入」、「加利仔有三樣嘢唔好，唔夠快、跑得慢、冇速度」及「碧咸係一個得一隻右腳嘅球員」，網民又讚阿倫夠眼光，貼中法國捧盃。
面對網友評論，阿倫越洋向本報表示事前已閱讀大批相關資料：「我所講任何一樣嘢都中晒啦，我話佢手球就手球喇！之前都好好笑，啲人講有先兆，支持克羅地亞慶祝，除晒衫喺度狂歡，已經講決定性喺個手球度，好多細微嘢都講咗出嚟，即係可能係有人認為我唔夠中肯，只係支持法國，但我兩邊都有睇。當然法國隊我一早已經預測咗會贏，法國同比利時，但佢哋兩隊喺埋一條線冇得講嘅，始終會淘汰一隊，咁冇得講，年輕力壯都會係咁。」
他又評論克羅地亞球員表現：「最好笑係上一場嗰個文迪蘇傑，佢係絕殺英格蘭，到今次佢又變咗擺烏龍，另一個追埋平手嗰個比列錫，亦都變為手球，仲變咗決定影響全場波嗰球，所以好多嘢，冥冥中有主宰。」問到如何慶祝法國奪冠？他說：「冇喎，我哋散場時遇傾盆大雨，各有各田雞過河，我來回跑六、七次周圍搵人，返到去已經要浸熱水，浸番醒個人。」
祖兒瞓覺 霆鋒藐爆
另邊廂，天后容祖兒與英皇集團老闆楊受成、蔡卓妍（阿Sa）及謝霆鋒同樣在俄羅斯睇比賽，怎料支持法國的祖兒被霆鋒「出賣」，將她睇波期間睡覺的片段擺上網，更用鄙視眼神表示：「當然世界盃也不是每個人都喜歡的」祖兒即時反擊，聲稱只是與球員一樣中場休息15分鐘，及後與阿Sa化身「講波妹」，力證有欣賞賽事。同場亦有賭王三房兒子何猷啟與未婚妻GiGi、陳伶俐與老公及孫耀威夫婦，齊齊在社交網放閃，拍住拖睇世界盃。
譚詠麟金句：
時間一分一秒咁樣過去。
球員打呢啲大賽真係要好冷靜。
禁區左上角啲草短啲， 球員好容易跣低。
暫時嚟講，講主導權都喺克地嗰邊， 但法國拎波嗰陣， 個主導權就喺法國嗰邊。
呢場波真係好精彩。
普巴真係大賽球員！（普巴入完波先講）
雖然克羅地亞打開逆境波，但都冇理由咁逆境。
敵進我退，敵退我進！
更多新聞，瀏覽東方日報網頁：
http://orientaldaily.on.cc/
|
鍾意就快D Share啦！
|
|
|