四哥謝賢今晚喺尖沙嘴出席鮑魚宴，同前妻狄波拉、鬍鬚Kong同胡楓（修哥）同場，四哥精神奕奕、談笑風生，佢提到自己回復單身，好彩跟個仔霆鋒去拍《鋒味》搵番兩個錢自己使，問四哥會唔會有旅遊節目搵佢做？佢就話：「有人請我做乜都做！唔知係咪覺得我老，我好有魄力㗎！」
問到四哥o依家係咪嚴選對手、唔再《4個小生去旅行》時有積怨而動手嘅曾江合作？四哥即大爆內幕話：「痴線嘅！我哋o依家唔知幾friend，嗰時係做戲嘅！」
咪住！回一回帶先，事緣2015年四哥、修哥、曾江同Joe Junior一齊宣傳大台節目《4個小生去旅行》，喺記招上四哥疑與曾江有積怨，突然喺記招上出手摑曾江，修哥勸交時被打飛眼鏡，場面混亂（新聞連結： https://bit.ly/2IQgDZp ）。o依家四哥咁講，咁即係……
記者笑問佢哋真好戲，四哥續說：「真到不得了！」修哥連眼鏡都飛埋出嚟喎？四哥話：「佢自己做㗎嘛，佢用手指撳住個眼鏡，佢好好戲，係老戲骨，好戲過我哋好多。嗰巴係四個人一齊度邊個做，係擺我上枱，我個人有乜所謂啫，咁一巴，我幾威呀，不知幾過癮！但係後尾就唔過癮呀，因為個個指住我鬧，幾陰功呀，做埋啲咁嘅衰嘢！」
問四哥有冇請曾江食飯賠罪？佢話：「打完之後即刻請佢食雪糕啦，等佢冷番。o依家先爆都未遲，真係㗎！做電影出盡辦法宣傳，幾衰呀！係我謝老四先咁蠢。佢哋本身係搵胡楓做嘅，但係佢講嘢啊啊啊…咁樣鬼聽佢呀！」
精選娛聞，喺晒《娛果》
http://fb.com/appledailyent
| （右圖攝影：林賓尼） | | |
| | | |
|
鍾意就快D Share啦！
|
|
|
