四哥謝賢、薛家燕、蕭定一同羅霖等，今晚喺尖沙嘴福臨門出席鮑魚宴。
四哥心情大靚，遇上記者滔滔不絕，盡訴心中情，四哥大讚霆鋒深得真傳，烹飪了得，仲笑言：「佢連記者都搶埋我，我冇得撈，啲記者都唔理我，好嬲佢㗎。」問到霆鋒會唔會再買樓俾佢？四哥話：「買嚟做乜？佢都費事我搬嚟搬去，將來都係佢㗎啦，呢個只係佢嘅心事。」
年過80嘅四哥之前一直傳同女友CoCo分手（新聞連結： https://bit.ly/2z2kenw ），今晚四哥直認冇拖拍，仲爆孤獨生活好枯燥，四哥話：「冇拖拍先死，呢幾日同啲親戚朋友都有講，真係好悶，起身就望住個海，早餐食飯都係一個人，好枯燥。o依家有少少嘢搵我做就開心啲，因為真係好似坐監咁，o依家《12道鋒味》都有搵我出吓鏡，搵返兩個錢自己使，係咪都有啲嘢做吓，一條『冷』，屋企又大。」
四哥仲話年紀老冇乜錢使，又好慳，佢話：「霆鋒咁多錢都係因為我冇乜使過，我唔識使錢，都唔想浪費個仔嘅錢。」問佢係咪因為覺得賺錢辛苦，都唔想個仔咁辛苦？佢就話：「唔理我以前賺錢唔辛苦呀！」至於問到四哥有冇見兩個孫仔？佢就話：「兩個星期見一次，好規律，依家係阿爺睇個孫，唔係個孫嚟探望我，佢哋仲細，唔知道乜嘢關係，睇到佢哋個心會甜啲。」
問到「新抱仔」王菲有冇探望？四哥話：「探都係探個仔啦，做乜嚟探我？」佢仲話會唔會再婚係霆鋒嘅私事，佢唔會多問，只係想個仔開心，問佢係咪怕畀霆鋒鬧？四哥話：「唔係，嗰個係我個仔，呢啲係佢嘅私事，我拍拖都冇話畀我老竇知啦。」
另外，家燕姐為鮑魚產品任代言人，為期兩年，之後佢仲會為品牌推出嘅月餅代言，佢笑話：「我做代言銷量會好高，老闆搵我真係聰明。」問到係咪收聰明價？家燕姐就話：「係精明價。」
提到同新抱相處成點？家燕姐就話好開心，仲話新抱叫佢做媽咪，自己感覺多咗個女，又話新抱係從事幼兒教育，遲啲都會去家燕姐開嘅學校幫手，問到怕唔怕工作上會意見不合？家燕姐就話唔會，亦唔會鬧新抱，佢就：「唔需要，我仔女都冇鬧嘅，我同新抱已經相處咗年幾兩年，大家都好好，我係唔強硬、唔專制嘅。」家燕姐仲笑自己唔係野蠻奶奶，而係燦爛奶奶。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
