【《蘋果》專訪】娛樂圈今年喜事重重，三位準媽媽利嘉兒（Lily）、林芊妤（Coffee）及吳日言（Yan）分別懷孕7個多月、6個多月及4個多月，並於日前接受本報安排的P牌媽咪大測試，挑戰餵奶、換尿片及沖涼三個任務！
學開奶方法
第一個要挑戰項目是餵奶，資深陪月課程導師林姑娘向三位準媽媽來個快速測試兼訓練，預產期最近的Lily笑說：「其實之前都有聽過啲講座，但唔記得咗，只知道BB飲好少。」Coffee只記得用3分1凍水，3分2熱水幫姪仔開奶，Yan就簡直毫無頭緒。林姑娘提醒三人開奶先落水再落奶粉，否則難以計算份量，又更正Coffee用凍水及熱水開奶的說法，林姑娘又教她們如何為BB掃風。
三位準媽媽直認獲益良多，Yan表示已幻想到BB出世後會好忙，Coffee說：「𠵱家好多人都會餵母乳，但我都唔抗拒餵奶粉，所以今次學到嘅都會用得着！」Coffee換片比較熟手，原來多得以前幫過姪仔，但當時卻中招被「斟茶」。除了照顧BB飲食和換尿片，幫BB沖涼、洗頭也很重要，Yan未開始已經覺得好難。
老公幫餵奶
總括三項測試，Lily表示：「覺得沖涼最難，我估我有70幾分，但相信真係要照顧會快上手，會提醒自己步驟唔好出錯，有信心做到100分。」Yan則笑說：「對上一次學沖涼係幫狗狗，幫BB沖當要更加細心，唔上堂唔知自己錯咁多嘢，好似冇一樣啱，到時會邊做邊學！」Coffee就開玩笑說：「我覺得自己70幾分，有進步空間，沖涼真係好難，所以餵奶、換片呢兩part會交畀老公做。」
採訪：小米
場地提供：香港人才培訓中心
|
鍾意就快D Share啦！
|
|
|