佘詩曼今日出席雪花秀活動，佢喺台上講到護膚心得，最緊要適合自己嘅護膚品，佢覺得女性一生嘅職業就係扮靚。現場見阿佘頸上有一撻撻紅印，佢話因太熱敏感。接受訪問時，講到拍劇成日都會護膚比食飯時間多，每日用個幾兩個鐘護膚，日頭同夜晚都會敷mask，尤其坐飛機補濕好重要，所以護膚係佢最大開支。
最近《延禧攻略》熱潮，依家人人見到阿佘都叫佢做嫻妃，噚晚佢坐夜機返港，佢話︰「送餐時收到張卡，寫住『嫻妃娘娘，係用完餐之後，可唔可以同後宮小主影相。』大家都好入戲。」講到係咪多咗工作，阿佘表示都有嘢傾緊，至於會唔會加價？佢就話由經理人決定。
有傳阿佘以200萬拍《延禧》，讚佢又平又正？阿佘話︰「呢套劇好受歡迎，台前幕後都好開心，一個話題咁hit，當中有真有假、有褒有貶，自己聽完笑吓就算。」問佢價錢唔係呢個價？佢就引用劇中高貴妃一句對白︰「呢件事幾荒謬都好，只要有人相信都會當成真。我自己唔使解釋咁多。自己知就得。」講到套劇咁受歡迎，係咪賺咗？阿佘話︰「我覺得自己冇蝕，呢套劇我拍得好開心。」
劇中演「袁春望」嘅王茂蕾，因背叛「魏瓔珞」，因網民太入戲遷怒於佢，對此阿佘就話，係一件好事，觀眾好投入。至於演魏瓔珞嘅吳謹言，被指耍大牌？阿佘就話︰「有聽聞呢單新聞，但詳情唔了解，不過佢好似道咗歉，平時接觸嘅佢好好，都nice o架。」
問到阿佘會唔會繼續拍宮廷戲？佢就話︰「係有人搵，的確比以前多，（有興趣拍？）吊下你哋癮先。」有傳《延禧》開續集？她就稱：「唔知有冇呢件事，好彩戲入面我冇死到。」
早前舊愛鄭嘉穎同陳凱琳結婚，問阿佘有冇恭喜對方？阿佘就話︰「早幾個月我唔係香港，未有機會見面，（會否send訊息？）咁重要嘅事梗係當面講，（請食飯？）係咪應該佢請我。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
