黃子華最後一次棟篤笑「金盆𠺘口」26場演出，前晚在紅館圓滿落幕。子華從90年首場棟篤笑「娛樂圈血肉史」開始，無間斷為香港人製造歡笑。子華前晚為他連續28年的棟篤笑生涯畫上句號，謝幕時，亦不禁落下男兒淚，棟篤笑變成「棟篤喊」，全場觀眾對子華大叫：「多謝你！」
黃子華前晚在紅館舉行「金盆𠺘口」棟篤笑尾場，之前子華宣佈將於今次表演後正式封咪，所以前晚的尾場亦是子華最後的棟篤笑表演。前晚表演子華繼續以香港作主題，貫徹他之前所講今次表演為100%純香港。其實子華由90年開始舉辦首場棟篤笑，最初是以其自身不被重用的演藝生涯，諷刺娛樂圈；之後逐漸加入政治敏感話題，作風大膽又不失風趣，28年間為港人製造無數歡樂。
水杯贈觀眾
連續26場演出前晚終於畫上句號，子華在尾聲時，向四面謝幕不禁落下淚來，全場觀眾立刻大叫：「多謝你！」不少嘉賓包括子華好友古巨基與太太等，都站起以掌聲向子華致意。子華一抹眼淚後，就將飲水杯拋落台給觀眾，笑說：「一隻杯，萬幾人分咩，真係最後時間喇！」
子華在完場前，以13點總結28年來做棟篤笑的原因：「當年呢個咁樣嘅儍佬，做呢樣嘢嘅時候原因係乜呢？以下係我做棟篤笑嘅原因，排名不分先後時間或重要性，總共有13點。」他逐點列出︰「1.朋友患腎病。2.時常失眠。3.做咗一個唔係喜劇嘅個人表演，卻引來不少笑聲。我其中一部份係做《哈姆雷特》，邵國華直情話『你應該做stand up comedy，因為你夠賤，一個最賤嘅《哈姆雷特》。』」
子華續說：「4.收工後唔想返屋企，返屋企後唔想返工。5.搞笑騷開始流行。6.第一場多謝過嘅葉潔馨小姐話『你應該做stand up comedy』。7.讀咗一本邊緣棟篤笑嘅書。8.睇咗Eddie Murphy（愛迪梅菲）嘅棟篤笑。9.迷惘，書都唔想睇。10.儲蓄咗好耐嘅小量金錢，一下子被借光。11.睇許冠文喺許冠傑嘅演唱會做棟篤笑。12.太寂寞，養咗隻狗。13.快三十。」
似「幻海奇情」
說完13點後，子華感慨說︰「我唔知邊啲朋友捱緊生活，話你聽，我嗰時睇都唔係容易捱，我睇呢十幾點。好𠵱家竟然做完㖭，真係『幻海奇情』，我唔知呢個故事係勵志定摧毀你，大家可以返去諗吓，但係我真係覺得係好豐富嘅虛幻過程。」接着他清唱出《幻海奇情》，表演亦正式結束。
完場後，子華從後台門口離開紅館，逾三百粉絲送別，見到偶像大叫兼送禮，粉絲更說等偶像反口再開騷，子華則一直揮手告別。子華之後出席慶功宴，圈中好友包括古巨基夫婦及蔡一智夫婦到場祝賀，蘇施黃及金燕玲更送上「金盆𠺘口」蛋糕，非常有心思。
採訪︰曹家誠
攝影︰陳俊強
|
鍾意就快D Share啦！
|
|
|