男人四十歲......陳智燊(Jason)覺得是時候作出轉變。
Jason上月剛約滿大台，離開工作12年嘅地方，有指佢為迎接下月來臨嘅小生命，決定全職做湊仔公兼YouTuber。但原來Jason未有放棄演藝事業，離開其實係想做得更多，Jason日前接受《蘋果》專訪時話﹕「做演員唔一定喺電視台，亦唔一定喺某間公司。我覺得可以試好多唔同嘅嘢，例如大陸、馬來西亞、新加坡都有好多機會，之前都搵過英國Netflix casting，如果有機會當然好想去荷里活啦，我知係好遠嘅事，現在仲物色緊經理人。」
聽落有好多計劃，但其實一樣都未落實，仿佛離開大台要面對好大風險。Jason話﹕「話唔擔心就假嘅，但要有信心，信心大唔大就一時一時。我會諗一啲前輩做例子，好似劉德華、古天樂，佢哋一開始就拍好多電影，但呢啲例子好少，係咪要做到咁勁先離開呢？！當你唔係佢哋，就更加要勤力啲，諗多啲唔同出路。」
Jason坦言考慮過程中，大部份人都潑冷水，佢話﹕「有冇問陳豪意見？都有嘅，問咗好多前輩，台前幕後都有關心，佢哋會擔心我嚟緊有家庭，唔穩定，陳智燊會唔會handle唔到。」太太宋熙年(Sarah)呢？Jason話﹕「女仔點都會保守啲，呢方面佢有(反對)，但同時佢亦明白我呢個決定，知道呢個時間唔闖，唔知五年、十年後仲有冇勇氣去做。我覺得現在狀態係唔錯嘅，就算撞板，要chur、要捱、要飛都好，Sarah係擔心，但會理解同支持。」
03年，Jason毅然放棄英國一份穩定工作，隻身來港發展，佢話﹕「其實當時環境同現況好相似，但以前比現在更細膽，唔知咩可以講，咩唔可以講，中文仲差啲，返嚟(香港)係由零開始，嗰個驚比現在大好多。」
採訪﹕嵐山
攝影﹕林賓尼
攝錄﹕廖達燊
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|
