長逾半世紀的婚姻會是怎樣？今集《港。故》的主角或許能給你一些線索。
早在六十年前的1958年，年輕的楊華應和許貞潔巧合下相識、相知繼而相戀。
賣水果老人為紅娘
「有個阿婆擔住擔生果問我結咗婚未，我答『未呀』，隔離油漆師父就叫阿婆介紹女仔畀我。」今日85歲的華應耳朵雖然聽不清楚，但對如何認識老伴的故事仍然記憶猶新。
當年正值雙十年華的貞潔不乏追求者，她說舊日在鄉下讀書時曾有老師寫信約她，「嘥氣啦，我係你學生咋嘛，當時我仲鬧佢。」而華應老實的特質，即是貞潔口中的「擔屎唔偷食」，就令兩人走在一起。
今日拍拖活動可謂多姿多采，但半世紀前又是怎樣？「無咩錢，就係行下傾下偈，最鍾意就係去維多利亞公園曬月光，唔需要去邊度行，好清靜，或者去大排檔食嘢，就係咁簡單。」貞潔回憶說。
為養家打兩份工終捱出病
就是這樣拍了拖六年，二人共諧連理，並生了四個小孩，舊日社會資源貧乏，他們生活就更艱苦。做地盤主管的丈夫負責煮飯，妻子就車衣，「我十八歲學車衫，車到後來結咗婚有BB，就買咗部摩打車日日夜夜喺屋企車，夜晚去交貨、拎貨又送貨，孭住細路都一樣咁去拎。」
兩口子為養家出盡力，但貞潔還希望多賺錢，於是再兼職清潔，最終卻捱出病來，患上了乳癌。及後她接受手術，很快又再工作，「做完手術個零兩個月，唔知喺屋企做咩，手又無力，『死就死啦』咁就出返嚟做，點知隻手做做下又有返力。」
抗癌成功卻喪愛女 一度患抑鬱
生活彷似重回軌道，但好景不常，二人疼愛的幼女突然在家中風去世，貞潔更因而患上抑鬱，「佢喺度好開心，家庭好歡樂，走咗就灰晒，好似沉咗落大海咁。」幸好有丈夫在旁照顧和陪伴，令貞潔慢慢走出陰霾。
遲來五十年的蜜月
捱了大半生，子女相繼出身，兩老子算是苦盡甘來。二人早前參加了救世軍長者服務的「夢飛行」活動，與一班老友記免費去台灣旅行，他們形容，是一次遲來五十多年的「度蜜月」，原來也是他們第一次搭飛機，「我哋都未度過蜜月，結咗婚之後就一路捱，去旅行梗係最開心，未試過嘛。」貞潔笑道。
愛情長跑半世紀 盡在不言中
甜酸苦辣手牽手度過大半生，但到底另一半對自己有多重要？華應貫徹老實作風，二話不說答道「重要」，還多謝妻子一路以來的照顧，而妻子卻不置可否，「有咩重唔重要，夫妻係渡客船，都差唔多埋岸。」答案看似冷酷，但她對老伴的反應卻令人領悟更多。
「佢(華應)前排先入過醫院，去咗五次急症室你都唔知，到夜晚又唔得要打九九九入返去，緊張到連我都入埋醫院。」跨越半世紀的愛情長跑，味道是這樣。
今集《港。故》用7分鐘，帶大家參加這個遲來了幾十年的「苦盡甘來蜜月團」，感受這個平淡但不平凡的愛情故事。
-------------
《港。故》：東網每周專題習作，講故事、講香港人的故事，請關注《港。故》fb：
https://bit.ly/oncckonggufb
|
鍾意就快D Share啦！
|
|
|