ViuTV選秀真人騷《Good Night Show全民造星》自7月中播出後，是非不絕。上周播出的28、29集請來蕭定一、張建聲及吳漢邦等擔任星級評判，卻被網友插爆，導師劉美君更扯火怒轟評判亂嚟，更從後台衝出台前與評判對質，監製「花姐」黃慧君亦直說：「火都嚟埋呀！」
選秀真人騷《全民造星》已播至30集，最近播出的幾集請來其中一個合作夥伴HMV數碼中國集團的五位代表包括主席蕭定一、歌手鄧健泓、導演吳漢邦、演員張建聲及趙永洪擔任星級評判，但卻成為眾矢之的。當參賽者表演完後，張建聲竟問：「你個頭（髮型）搞乜？」蕭定一再下一城問：「你覺唔覺得Oscar呢個名比較普通？會唔會好容易同人撞名？」而導演吳漢邦亦寸爆︰「啲帽點解要掟？」
大堆廢評成功點燃多位導師，卓韻芝在後台狂寸他們hea，郭偉亮亦說他們只懂抨擊名字、髮型，監製花姐亦不禁鬧爆：「可唔可以講啲有意義嘅嘢……火都嚟埋呀！」反應最激烈的就是劉美君，更㷫到在後台爆seed：「頂你個肺！」再衝出舞台與評判對質。
| | |
真心想幫班細路
劉美君昨日接受《蘋果》訪問，她說：「我忍無可忍決定講清楚，我都戥ViuTV唔抵，因為有人喺網絡留言，認為有設計情節。」她坦言：「我呢個人鍾意伸張正義，做呢個節目係想幫呢班有心喺呢個圈發展嘅細路，有人唔認真批評，我好勞氣。」花姐亦否認是設計情節︰「如果我要咁設計情節，一定俾老細斬死！」問是否有贊助才可以出鏡？她解釋︰「唔係，只係搵幾間公司去support我哋，佢哋喺參賽者中搵有潛質嘅人。」
被評名字太普通的涂心業（Oscar）回應︰「唔係好愕然，但預期comment係同表演有關。」另一參賽者姜濤表示：「我喺後台聽都有啲奇怪，唔係好理解，好似搞唔清重點。」
阿澤爆粗撐學員
杜汶澤亦於fb留言︰「Oscar，你個名太普通喇！你以後就叫9527」阿澤更不忿爆粗：「踩人邊個唔識吖？做人冇X用好小事，黑X心兼無品嗰吓大件事。」
據當晚現場錄影人士透露，參賽者當中有三、四位參賽者叫Oscar，有些更為此改名，所以蕭定一才有此一問，其實錄影時他也有給予意見，但偏偏節目卻大刀一剪，變成「斷章取義」。成為箭靶的蕭定一就封嘴說︰「冇回應。」
採訪︰皓鶱、霍淇、陳杰
|
鍾意就快D Share啦！
|
|
|