曾經自嘲自己係「票房毒藥」嘅容祖兒，佢嘅演技大家有目共睹，但估唔到佢嘅創意都好老土，話說祖兒最近參加咗王菲做「幻樂體驗官」嘅大陸綜藝節目《幻樂之城》，不過佢有份創作同演出嘅8分鐘音樂故事，王菲就似乎唔多鍾意，指故事「生硬」，而祖兒亦直認「很俗」（老土），仲認得好開心添。
事緣祖兒今次同大陸導演蔣笑笑合作，演出名為「如果還有明天」嘅音樂劇，故事就講述容祖兒同劇中男友Oscar（…又係叫Oscar…）參加比賽，然後比賽完發現男友同另一個女仔錫錫。跟住男友狠心同佢講分手，但最後又發現原來男友係有病、為咗唔影響佢比賽先咁做，而男友最後仲要死埋。
呢啲咁嘅老土劇情，連畫面都老土，尤其係劇中祖兒掀開廉見到男友同人錫錫、同祖兒去到醫院掀開廉見到張空嘅病床嘅場面，就連見慣世面嘅王菲亦都頂唔順，邊睇邊O嘴，而病床嗰幕更大叫「Oh My God！」
當祖兒表演完後，主持就問祖兒點解會有咁嘅創意，點知自爆人生中已經參加過33個婚禮嘅祖兒就好理直氣壯咁回答：「我喜歡愛情故事！」一講完，唔止全場，就連佢自己都忍唔住大笑。
之後導演蔣笑笑就幫祖兒解畫：「因為她一直在渴望、期待愛情。」到身為幻樂體驗官嘅王菲品評嗰陣，王菲先讚祖兒嘅歌唱得好，然後就彈劇情：「我實話實說，這個……（容祖兒插嘴：演技！）劇情，不是演技，我覺得劇情稍微有一點……生硬……就是為了這麼讓人家誤會，就找個甚麼...我覺得這個橋段，對我來說有點……（容祖兒再插嘴：很俗）生硬。」
而呢一刻主持亦忍唔住話：「每次祖兒一掀廉王菲都說『天哪』，一掀廉看到病床上，『天哪』。」之後王菲又話：「我真的沒想到，一掀廉子是這麼一個場面，之前我們開創意會的時候，好像不是這麼說的，我不知道是不是後來有了修改……」
而導演就表示係：「因為後來有跟祖兒溝通……」而呢個時候祖兒又衝出嚟插嘴話：「我喜歡俗（老土）一點！」搞到王菲都冇咁好氣，笑住話：「OK...這個是她自己的創意，她心目中一個美好愛情的樣子，可能就是這個樣子，她喜歡就好了，然後大家喜歡就好了...但唱得真的是非常好，非常好！」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|