「由第一日開始我哋都知道，就算賣翻唱歌都好，其實有好多謬誤，喺呢幾年入面都有好多人走嚟同我講，Sukie你就好啦，你唱翻唱碟，一定賺到好多錢但係我都會話番俾佢聽，其實做翻唱歌手，尤其是我咁挑剔，其實係無可能賺到錢，能夠打和已經算真係唔錯，好慶幸喺第三張唱片入面，我加入咗星娛樂公司，佢哋都好支持我，所以我好感恩。」唱Hi Fi碟打出一片天，Sukie嚟緊推出嘅唔再行Hi Fi碟路線，搵嚟韓國嘅Winterplay合作新歌《後兩步》！
「我話其實可以加入呢間公司真係好好彩，得到好多支持，佢哋當然已經都係不計成本，支持我做好多理念嘅嘢，包括同韓國樂隊Winterplay合作，其實真係都唔少錢。」Sukie嚟緊推出嘅大碟叫《Moving Forward》，但新歌歌名就叫《後兩步》，好矛盾吓喎！「因為其實大家諗深一層，我哋香港人步伐好快，成日都話要向前、要進步，我諗無人會話唔想進步，包括我，我都好希望能夠進步，每一次都係，與此同時我哋可能真係會麻木地想行快啲，想追求自己進步多啲，但有時就係因為呢個麻木向前行，令到我哋嘅進步空間少咗，如果我哋能夠後兩步，睇番自己過去嘅作品，檢視番自己有冇啲不足之處，我哋究竟有冇錯過一啲機會，或者能夠做得更加好嘅嘢，其實我哋睇到嘅嘢，係能夠更加廣闊一啲，甚至乎可以咁講，我哋有個俗語，退一步海闊天空，我哋能夠見到嘅嘢，係直接影響我哋進步嘅空間有幾大，所以停一停、諗一諗。」
講完音樂喇，咁唔知Sukie同老公鄧健泓結婚後，生活上有冇咩唔同呢？「其實就多咗個名同埋責任啫，我個人認為喺責任上，我係未做得好好嘅，因為我媽咪係一個，如果你話女人點樣去評分，一百分滿分嘅話，佢係二百分，因為媽咪要工作，然後每一日都會打理屋企，掃地、吸塵，照顧我哋起居飲食，床鋪整理得好好，洗衫，我覺得佢真係好厲害。」咁唔知佢哋有造人計劃未呢？「無諗呀，真係無諗！其實我哋覺得而家嘅情況，我哋想先努力工作，努力去做多啲嘢先，儲吓錢先呢，好窮呀，做音樂係好窮㗎！」
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
採訪：肥A
攝錄：蕭敬漁、王志輝
Sukie服裝提供：COS
來源 source: http://nextplus.nextmedia.com
|
鍾意就快D Share啦！
|
|
|
